پرەزيدەنت قاسىم-جومارت توقاەۆ جەلتوقساندا اقش-تا وتەتىن G20 سامميتىنە قاتىسادى. بۇل تۋرالى سىرتقى ىستەر مينيسترلىگى ايتتى، دەپ حابارلايدى «ادىرنا» ءتىلشىسى.
مايامي قالاسىندا وتەتىن سامميتكە مەملەكەت باسشىسى اقش پرەزيدەنتى دونالد ترامپتىڭ شاقىرۋىمەن بارادى.
سامميتكە دايىندىق ماسەلەلەرى سىرتقى ىستەر ءمينيسترى ەرمەك كوشەرباەۆ پەن اقش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى جونىندەگى كومەكشىسى پول كاپۋردىڭ كەزدەسۋىندە تالقىلاندى.
«كەزدەسۋ بارىسىندا 2026 جىلدىڭ جەلتوقسانىندا ماياميدە وتەتىن G20 سامميتىنە دايىندىق ماسەلەلەرى بويىنشا پىكىر الماسۋ بولدى. سامميتكە مەملەكەت باسشىسى اقش پرەزيدەنتى دونالد ترامپتىڭ شاقىرۋىمەن قاتىسادى. وسىعان بايلانىستى تاراپتار جوعارى دەڭگەيدەگى كۇن ءتارتىبىن مازمۇندى تۇردە تولىقتىرۋ ماقساتىندا ءوزارا ءىس-قيمىلدى جالعاستىرۋعا دايىن ەكەنىن ءبىلدىردى»، – دەلىنگەن حابارلامادا.
كەزدەسۋدە قازاقستان مەن اقش اراسىنداعى ەكىجاقتى قاتىناستاردىڭ قازىرگى جاي-كۇيى مەن كەڭەيتىلگەن ستراتەگيالىق ارىپتەستىكتىڭ دامۋ پەرسپەكتيۆالارى قاراستىرىلدى.
تاراپتار ەكونوميكالىق ىنتىماقتاستىق ماسەلەلەرىنە دە ەرەكشە نازار اۋدارعان.
«امەريكا تاراپى ىنتىماقتاستىقتى ودان ءارى نىعايتۋعا مۇددەلى ەكەنىن راستادى جانە ەنەرگەتيكا، ستراتەگيالىق ماڭىزى بار مينەرالدار، وزىق تەحنولوگيالار، تسيفرلاندىرۋ، كولىك جانە ينۆەستيتسيالار سالالارىنداعى ءوزارا ءىس-قيمىلدى كەڭەيتۋگە ۇلكەن الەۋەت بار ەكەنىن اتاپ ءوتتى»، – دەپ مالىمدەدى ءسىم.
ەرمەك كوشەرباەۆ قازاقستانداعى ساياسي جانە الەۋمەتتىك-ەكونوميكالىق رەفورمالار تۋرالى ايتىپ، ەلدىڭ جاڭا دامۋ كەزەڭىنە قادام باسقانىن جەتكىزدى.
كەزدەسۋدە 23 تامىزدا وتەتىن قۇرىلتاي سايلاۋى دا ءسوز بولدى. ءسىم بۇل ناۋقان جاڭا كونستيتۋتسيالىق مودەلدى ءىس جۇزىندە جۇزەگە اسىرۋداعى ماڭىزدى كەزەڭ بولاتىنىن اتاپ ءوتتى.
سونداي-اق تاراپتار قازاقستاننىڭ سۋ رەسۋرستارىن جاھاندىق باسقارۋ جۇيەسىن نىعايتۋ جونىندەگى باستاماسىن تالقىلادى. اڭگىمە قاسىم-جومارت توقاەۆتىڭ بۇۇ-نىڭ مامانداندىرىلعان مەكەمەسى رەتىندە حالىقارالىق سۋ ۇيىمىن قۇرۋ تۋرالى ۇسىنىسى توڭىرەگىندە ءوربىدى.
