قازاقستاندىق فۋتبولشى داستان ساتباەۆ «چەلسيدىڭ» انگليا پرەمەر-ليگاسىنىڭ جاڭا ماۋسىمىنا تىركەلگەن ويىنشىلارىنىڭ قاتارىنا قوسىلدى. لوندوندىق كلۋبتىڭ اپل سايتىنداعى رەسمي قۇرامىندا 18 جاستاعى شابۋىلشى 36-نومىرمەن كورسەتىلگەن، دەپ حابارلايدى "ادىرنا".
وسىلايشا، ساتباەۆتىڭ انگليا چەمپيوناتىنىڭ رەسمي پورتالىندا جەكە ءپروفيلى العاش رەت پايدا بولدى. دەگەنمەن ازىرگە ونىڭ پاراقشاسىندا فۋتبولشىنىڭ فوتوسۋرەتى ورنالاستىرىلماعان. ال «چەلسيدىڭ» رەسمي سايتىندا قازاقستاندىق ويىنشىنىڭ ءپروفيلى ءالى جاريالانعان جوق.
اپل-ءدىڭ جاڭا ماۋسىمى كەلەسى اپتادا باستالادى. «چەلسي» العاشقى كەزدەسۋىن 25 تامىزعا قاراعان ءتۇنى «فۋلحەمگە» قارسى وتكىزەدى. بۇعان دەيىن لوندوندىق كوماندا «رەال سوسەدادپەن» جولداستىق ماتچ وتكىزۋى كەرەك.
داستان ساتباەۆ 12 تامىزدا 18 جاسقا تولدى. وسىدان كەيىن بىرقاتار ستاتيستيكالىق پورتالدار ونىڭ «چەلسيگە» رەسمي تۇردە تيەسىلى ەكەنىن كورسەتتى.
قازاقستاندىق ۆينگەر وسى ۋاقىتقا دەيىن كلۋبتىڭ جەيدەسىندە ءتورت ويىن وتكىزىپ ۇلگەرگەن. ول ماۋسىم الدىنداعى تۋرنە كەزىندە كوماندا ساپىندا قارالىمداعى فۋتبولشى رەتىندە ونەر كورسەتتى.
ساتباەۆ «چەلسيدەگى» العاشقى گولىن دەبيۋتتىك ماتچتارىنىڭ بىرىندە كەزدەسۋدىڭ التىنشى مينۋتىندا سوقتى. بۇل گول قازاقستاندىق جانكۇيەرلەر اراسىندا ۇلكەن قىزىعۋشىلىق تۋدىردى.
سونىمەن قاتار فۋتبولشىنىڭ جاڭا ماۋسىمدى باسقا كلۋبتا جالعا وتكىزۋى مۇمكىن دەگەن اقپاراتتار دا تاراعان. باق مالىمەتىنشە، ساتباەۆقا فرانتسۋزدىق «ستراسبۋر»، اعىلشىندىق «حالل سيتي»، يسپانيالىق «راسينگ» جانە قازاقستاندىق «قايرات» قىزىعۋشىلىق تانىتىپ وتىر.
ساتباەۆتىڭ «چەلسي» سابىنداعى العاشقى ويىندارى قازاقستاندا ۇلكەن رەزونانس تۋعىزىپ، جاس فۋتبولشىنى ەلدەگى ەڭ كوپ تالقىلاناتىن سپورتشىلاردىڭ بىرىنە اينالدىردى.
