ەۋروپالىق وداق سوڭعى بەس جىلدا اۋعانستانعا ميللياردتاعان دوللار كولەمىندە كومەك كورسەتكەنىمەن، ەلدەگى گۋمانيتارلىق جاعداي ناشارلاي تۇسۋدە. 2026 جىلى بەس جاسقا دەيىنگى شامامەن 3,7 ميلليون بالا تويا تاماقتانباۋدان زارداپ شەگىپ وتىر. ال حالىقارالىق قارجىلاندىرۋدىڭ قىسقارۋى سالدارىنان 600-گە جۋىق مەديتسينالىق مەكەمە جابىلعان نەمەسە جۇمىسىن توقتاتقان، دەپ حابارلايدى «ادىرنا» ءتىلشىسى Fergana-عا سىلتەمە جاساپ.
ەۋروپالىق وداقتىڭ 13 تامىزدا تاراتقان مالىمدەمەسىندە 2021 جىلدىڭ تامىزىندا «تاليبان» بيلىككە قايتا كەلگەننەن بەرى بريۋسسەلدىڭ اۋعانستانعا 2 ميلليارد ەۋرودان استام قاراجات بولگەنى ايتىلعان. قارجى گۋمانيتارلىق كومەككە، دەنساۋلىق ساقتاۋ، ءبىلىم بەرۋ سالالارىنا جانە حالىقتىڭ نەگىزگى قاجەتتىلىكتەرىن قامتاماسىز ەتۋگە باعىتتالعان.
ەۋروپالىق سىرتقى ءىس-قيمىل قىزمەتىنىڭ (EEAS) مالىمەتىنشە، قاراجات ۇكىمەتتىك ەمەس ۇيىمدار، بۇۇ قۇرىلىمدارى، حالىقارالىق قىزىل كرەست كوميتەتى، اۋعانستان قىزىل جارتى اي قوعامى جانە دۇنيەجۇزىلىك بانك ارقىلى جەتكىزىلگەن. بۇل قاراجات «تاليبان» باقىلاۋىنداعى مەملەكەتتىك قۇرىلىمدار ارقىلى وتپەيدى جانە ولارعا پايدا اكەلمەيدى.
سوعان قاراماستان، گۋمانيتارلىق ۇيىمدار جەرگىلىكتى جەرلەردەگى جاعدايدىڭ كۇرت ناشارلاعانىن ەسكەرتىپ وتىر. Pajhwok Afghan News باسىلىمىنىڭ مالىمەتىنشە، سوڭعى ءتورت جىلدا بەس جاسقا دەيىنگى تاماق تاپشىلىعىنا ۇشىراعان بالالار سانى 14 پايىزعا ءوسىپ، 2026 جىلى شامامەن 3,7 ميلليونعا جەتكەن. بۇل – وسى جاس ساناتىنداعى ءاربىر ونىنشى بالا. بيىلعى جىلدىڭ ەكىنشى توقسانىندا جاعداي اۋعانستان پروۆينتسيالارىنىڭ ۇشتەن ەكىسىندە وتكەن جىلمەن سالىستىرعاندا ناشارلاعان.
سونىمەن قاتار گۋمانيتارلىق قارجىلاندىرۋدىڭ قىسقارۋىنا بايلانىستى ەلدەگى 600-گە جۋىق مەديتسينالىق مەكەمە جابىلعان نەمەسە جۇمىسىن توقتاتقان. سونىڭ سالدارىنان شامامەن 4 ميلليون ادام مەديتسينالىق قىزمەتتەن قاعىلعان، ولاردىڭ جارتىسىنا جۋىعى – بالالار.
Save the Children ۇيىمىنىڭ اۋعانستانداعى ديرەكتورى اشيش دحاممالدىڭ ايتۋىنشا، اشتىقتىڭ كۇشەيۋى، ميلليونداعان ميگرانتتىڭ ورالۋى، حالىقتىڭ ىشكى قونىس اۋدارۋى، تابيعي اپاتتار مەن ۇزاق جىلدارعا سوزىلعان قۇرعاقشىلىق ونسىز دا شەكتەۋلى گۋمانيتارلىق رەسۋرستارعا قوسىمشا سالماق ءتۇسىرىپ وتىر. ول حالىقارالىق قاۋىمداستىقتى داعدارىس تەرەڭدەپ كەتپەي تۇرعاندا ارەكەت ەتۋگە شاقىردى.
ال Al Jazeera باسىلىمىنىڭ Save the Children دەرەكتەرىنە سۇيەنگەن مالىمەتىنە سايكەس، سوڭعى ءتورت جىلدا اۋعانستانعا حالىقارالىق گۋمانيتارلىق كومەك كولەمى شامامەن 70 پايىزعا قىسقارعان. ەگەر 2022 جىلى بۇل كورسەتكىش 3,27 ميلليارد دوللار بولسا، 2025 جىلى شامامەن 1 ميلليارد دوللارعا دەيىن تومەندەگەن. 2026 جىلدىڭ ورتاسىنا قاراي قاجەت قارجىلاندىرۋدىڭ نەبارى 438 ميلليون دوللارى عانا قامتاماسىز ەتىلگەن، ياعني تاپشىلىق شامامەن 74 پايىزدى قۇرايدى.
وسىلايشا، قايشىلىقتى جاعداي قالىپتاسىپ وتىر. ەۋروپالىق وداق «تاليبان» بيلىككە ورالعاننان كەيىن اۋعانستانعا 2 ميلليارد ەۋرودان استام كومەك كورسەتكەنىن مالىمدەسە، گۋمانيتارلىق ۇيىمدار بالالار اراسىنداعى تاماق تاپشىلىعىنىڭ ارتۋىن جانە حالىقتىڭ نەگىزگى مەديتسينالىق قىزمەتتەرگە قولجەتىمدىلىگىنىڭ تومەندەۋىن تىركەپ وتىر. ساراپشىلار مۇنى بارلىق دونورلاردان كەلەتىن حالىقارالىق كومەكتىڭ، اسىرەسە قارجىلاندىرۋدى كۇرت قىسقارتقان اقش سياقتى ءىرى دونورلاردىڭ ۇلەسىنىڭ ازايۋىمەن تۇسىندىرەدى. سوندىقتان ەۋرووداقتىڭ ۇلەسى ارتقانىمەن، جالپى حالىقارالىق كومەك كولەمى تومەندەپ بارادى.
