«زاڭ مەن ءتارتىپ» قاعيداتىن جاستار اراسىندا كەڭىنەن ناسيحاتتاۋ، قۇقىقتىق مادەنيەتتى قالىپتاستىرۋ جانە جاس ۇرپاقتىڭ ازاماتتىق بەلسەندىلىگىن ارتتىرۋ ماقساتىندا QZO CUP «زاڭ مەن ءتارتىپ – جاستار تاڭداۋى» رەسپۋبليكالىق پىكىرسايىس ءتۋرنيرى ءوتتى.
ەكى كۇنگە سوزىلعان ينتەللەكتۋالدىق دوداعا ەلىمىزدىڭ ءار وڭىرىنەن كەلگەن ۇزدىك دەباتشىلار قاتىسىپ، ءوزارا باق سىنادى. تۋرنير بارىسىندا قاتىسۋشىلار ءبىلىمىن، لوگيكالىق جانە سىني ويلاۋ قابىلەتىن، شەشەندىك ونەرىن، ءوز ۇستانىمىن دالەلدى تۇردە قورعاۋ جانە قارسى پىكىرگە ساۋاتتى جاۋاپ بەرۋ داعدىلارىن كورسەتتى.
«زاڭ مەن ءتارتىپ» قاعيداتى – قوعامداعى تۇراقتىلىق پەن قاۋىپسىزدىكتى قامتاماسىز ەتۋدىڭ ماڭىزدى نەگىزدەرىنىڭ ءبىرى. وسى قۇندىلىقتاردى جاستار اراسىندا دارىپتەۋ باعىتىندا پىكىرسايىس الاڭىنىڭ ماڭىزى زور. سەبەبى دەبات بارىسىندا جاستار ءوز ويىن ەركىن جەتكىزىپ قانا قويماي، زاڭدىلىقتى قۇرمەتتەۋ، ازاماتتىق جاۋاپكەرشىلىك جانە قوعام الدىنداعى مىندەتتەر تۋرالى پىكىر الماسۋعا مۇمكىندىك الدى.
ءتۋرنيردىڭ باستى ەرەكشەلىكتەرىنىڭ ءبىرى – ەلىمىزدىڭ ءار وڭىرىنەن كەلگەن جاس دەباتشىلاردىڭ ءبىر الاڭدا باس قوسىپ، تاجىريبە الماسۋى. ءار ءوڭىردىڭ وزىندىك دەبات مادەنيەتى، تاجىريبەسى مەن جاڭا يدەيالارى ورتاق پىكىرتالاس الاڭىندا توعىستى.
جارىس قورىتىندىسى بويىنشا 1-ورىندى تاراز قالاسى مەن الماتى قالاسىنىڭ «تاراز ماحابباتىم» كومانداسى يەلەندى. 2-ورىن تۇركىستان وبلىسىنىڭ «بەكزات ساتتارحانوۆ» كومانداسىنا بۇيىرسا، 3-ورىندى الماتى وبلىسىنىڭ «ي، اقۇداي» جانە قىزىلوردا وبلىسىنىڭ «ۇيقىباستار» كوماندالارى ءوزارا ءبولىستى.
جەكە نوميناتسيالار بويىنشا «ەڭ ۇزدىك سپيكەر» اتالىمىنا الماتى قالاسىنىڭ وكىلى ەسەنوۆ تەمىرلان لايىق دەپ تانىلدى. «ۇزدىك سپيكەر» نوميناتسياسى شىمكەنت قالاسىنىڭ وكىلى قالحاباي نۇرمۇحامەدكە بەرىلدى. «ۇزدىك تورەشى» اتالىمىن نابات دۋمان سافۋانۇلى يەلەنسە، «ۇزدىك دەلەگاتسيا» تۇركىستان وبلىسىنا بۇيىردى. ال «كورەرمەن كوزايىمى» نوميناتسياسىمەن سەيسەنباي باقداۋلەت، تەڭەس مەيرامبەك جانە داستانۇلى دياس ماراپاتتالدى.
رەسپۋبليكالىق تۋرنير جوعارى دەڭگەيدە ۇيىمداستىرىلىپ، قاتىسۋشىلاردىڭ پىكىرتالاس مادەنيەتىن جەتىلدىرۋگە، سىني ويلاۋ قابىلەتىن دامىتۋعا جانە ءوز كوزقاراسىن ناقتى دالەلدەرمەن قورعاۋىنا مۇمكىندىك بەردى.
QZO CUP – جاستاردىڭ ءبىلىمىن شىڭداپ، ازاماتتىق ۇستانىمىن قالىپتاستىراتىن جانە «زاڭ مەن ءتارتىپ» قاعيداتىن ناسيحاتتايتىن ماڭىزدى پىكىرتالاس الاڭىنا اينالدى.
