12–13 قىركۇيەك كۇندەرى استانا قالاسىندا «Creative Aimaq» رەسپۋبليكالىق جوباسى اياسىندا «تامىردان تۋىندىعا…» اتتى كورمە-جارمەڭكە ءوتىپ جاتىر.
شاراعا قر مادەنيەت جانە اقپارات ۆيتسە-مينيسترلەرى ەۆگەني كوچەتوۆ، ايبەك سىدىقوۆ، كرەاتيۆتى يندۋستريالاردى دامىتۋ قورىنىڭ باسقارما توراعاسى ەرلان قاناليموۆ، وبلىس اكىمىنىڭ ورىنباسارى مەيرامبەك شەرماعانبەت جانە زيالى قاۋىم مەن باق وكىلدەرى، ەلوردالىق تۇرعىندار قاتىستى.
جوبا سىر ءوڭىرىنىڭ باي تاريحي-مادەني مۇراسىن زاماناۋي شىعارماشىلىقپەن ساباقتاستىرىپ، ۇلتتىق قۇندىلىقتاردى جاڭا فورماتتا تانىتۋعا جانە تىڭ يدەيالاردى جۇزەگە اسىرۋعا ارنالعان.
ءىس-شاراعا 100-گە جۋىق كرەاتور قاتىسىپ، 21 ەكونوميكالىق قىزمەت باعىتى بويىنشا اۆتورلىق تۋىندىلارى مەن شىعارماشىلىق ونىمدەرىن كوپشىلىك نازارىنا ۇسىنۋدا.
كەلۋشىلەر سىر بويىنىڭ باستى برەندتەرىنىڭ بىرىنە اينالعان اق كۇرىشتەن سالىنعان بەينەلەۋ ونەرى تۋىندىلارىمەن تانىسا الادى. شىعارمالار كۇرىشتىڭ ءوڭىر تاريحى مەن تۇرمىسىنداعى ماڭىزىن، سىر ەلىنىڭ تابيعاتى مەن مادەني ەرەكشەلىگىن تانىتادى.
سونىمەن قاتار كورمەگە ءداستۇرلى قولونەر مادەنيەتىن دارىپتەيتىن سۇيەك، اعاش جانە كيىزدەن جاسالعان ۇلتتىق بۇيىمدار قويىلعان. ءار بۇيىمدا سىر بويىنا ءتان ۇلتتىق ناقىش، ءداستۇرلى ورنەك جانە تابيعي ماتەريالداردى وڭدەۋدىڭ وزىندىك شەبەرلىگى كورىنىس تاپقان.
كرەاتيۆتى الاڭدا Qyzylorda Hub ماماندارى ءوز جوبالارىن، «Qyzylorda» تەلەارناسى «Syr Travel»، «Qyzylorda Expedition»، «قۇدايى قوناق» سەكىلدى كرەاتيۆتى جوبالارىن تانىستىرادى.
سونىمەن قاتار ەكى كۇن بويى Qazaq Creative Hub الاڭىندا سىر ءوڭىرىنىڭ ونەرپازدارى جاساندى ينتەللەكت تەحنولوگيالارىن شىعارماشىلىقپەن ۇشتاستىرعان كونتسەرتتىك باعدارلاماسىن كوپشىلىك نازارىنا ۇسىنادى.
ايتا كەتەيىك، ايماقتا كرەاتيۆتى يندۋستريانى دامىتۋ باعىتىندا بەلسەندى جۇمىس ىستەپ كەلە جاتقان 146 كرەاتوردىڭ 120-سى، ياعني 82,2 پايىزى رەسپۋبليكالىق كرەاتورلار رەەسترىنە ەنگىزىلگەن. بۇل كورسەتكىش قىزىلوردا وبلىسىن رەسپۋبليكا وڭىرلەرى اراسىندا العاشقى ۇشتىككە ورنىقتىردى.
