نيگەريانىڭ سولتۇستىك-باتىسىنداعى سوكوتو شتاتىندا ادامعا لىق تولى قايىق اۋدارىلىپ، سالدارىنان كەمىندە 40 بالا كوز جۇمدى، دەپ حابارلايدى «ادىرنا» ءتىلشىسى Reuters اگەنتتىگىنە سىلتەمە جاساپ.
اپات 20 تامىز كۇنى تاڭەرتەڭ بولعان. قايىقتاعى جولاۋشىلاردىڭ باسىم بولىگى كۇرىش جيناۋ ناۋقانىنا بارا جاتقان جاسوسپىرىمدەر بولعان.
«قازىرگى ۋاقىتتا شامامەن 40 بالانىڭ ءمايىتى تابىلعانىن راستاي الامىن»، – دەدى ۇلتتىق ىشكى سۋ جولدارى باسقارماسىنىڭ وڭىرلىك مەنەدجەرى ابدۋلكادير يۋسۋف.
سۇڭگۋىرلەر قازا تاپقانداردىڭ دەنەلەرىن سۋدان شىعارىپ جاتىر. ىزدەستىرۋ-قۇتقارۋ جۇمىستارى ءالى دە جالعاسۋدا.
ەسكە سالساق، وسىعان ۇقساس اپات بيىل قاڭتار ايىندا نيگەريانىڭ سولتۇستىك-شىعىسىنداعى يوبە شتاتىندا تىركەلگەن ەدى. سول كەزدە قايىق اۋدارىلىپ، 25 ادام قازا تاپقان.
ۇقساس جاڭالىقتار
