يرانداعى بەنزين ءوندىرىسىنىڭ تاۋلىكتىك كولەمى ورتا ەسەپپەن 120 ميلليون ءليتردى قۇرايدى. ال تاۋلىكتىك تۇتىنۋ كولەمى 135 ميلليون ليترگە جەتەدى، دەپ حابارلايدى «ادىرنا» ءتىلشىسى Anadolu-عا سىلتەمە جاساپ.
ەلدىڭ ەنەرگيا تيىمدىلىگى اگەنتىگى توراعاسىنىڭ ورىنباسارى ياسەر ءميرزايدىڭ ايتۋىنشا، يمپورتقا قويىلعان شەكتەۋلەرگە بايلانىستى ەلدە بەنزين قورلارى جۇمسالا باستاعان.
يراننىڭ ستۋدەنتتىك اقپارات اگەنتتىگى (ISNA) ءميرزايدىڭ ەلدەگى بەنزين تاپشىلىعىنا قاتىستى جاعدايعا تۇسىنىكتەمە بەرگەنىن حابارلاعان.
يراندىق شەنەۋنىك تامىز ايىندا يمپورتقا قويىلعان شەكتەۋلەرگە بايلانىستى ەلدەگى بەنزين قورىن پايدالانۋعا تۋرا كەلگەنىن جەتكىزدى.
«قورلار نەگىزىنەن قىسقا مەرزىمدى جانە توتەنشە جاعدايلارعا ارنالعان. قورلاردى ۇزاق ءارى تۇراقتى پايدالانۋ قيىندىقتارعا اكەلەدى. 2026 جىلى تۋىنداعان ماسەلەلەرگە بايلانىستى قوردان قوماقتى كولەمدە بەنزين جۇمسالدى»،–دەدى ول.
قازىرگى جاعدايعا بايلانىستى ەلدەگى بەنزين جەتكىزىلىمى ماسەلەسى كۇردەلى سيپات الىپ وتىر. ول الداعى ايلاردا تۇتىنۋ كولەمى ارتقان كەزدە جانارماي جەتكىزىلىمىنە قاتىستى قيىندىقتار تۋىنداۋى مۇمكىن ەكەنىن ەسكەرتتى.
ءميرزايدىڭ ايتۋىنشا، سوڭعى ءبىر ايدا يرانداعى بەنزيننىڭ ورتاشا تاۋلىكتىك تۇتىنۋ كولەمى 135 ميلليون ءليتردى قۇراعان. سوعىس پەن ەكونوميكالىق قيىندىقتارعا قاراماستان، ەنەرگيا رەسۋرستارىن تۇتىنۋ وسى دەڭگەيدە ساقتالعان. الداعى ايلاردا تۇتىنۋ كولەمى ايتارلىقتاي ارتپاق.
ول بۇل ءۇشىن جاڭا ينۆەستيتسيالار قاجەت ەكەنىن اتاپ ءوتتى. قولدا بار رەسۋرستار ەسەبىنەن ءوندىرىس كولەمىن ارتتىرۋ ارەكەتى وتىننىڭ ءارتۇرلى تۇرلەرىن ارالاستىرۋعا، سونىڭ سالدارىنان ونىڭ ساپاسىنىڭ تومەندەۋىنە اكەلۋى مۇمكىن ەكەنىن ايتتى.
بۇعان دەيىن يران ءماجىلىسىنىڭ ەنەرگەتيكا جونىندەگى كوميسسياسىنىڭ مۇشەسى ريزا سەپاحۆاند سوعىس جاعدايىندا بەنزين ءوندىرىسىنىڭ تاۋلىكتىك كولەمى 105 ميلليون ءليتردى قۇرايتىنىن مالىمدەگەن ەدى.
ەگەر بەنزين تۇتىنۋ كولەمى تاۋلىگىنە 135 ميلليون ليتر ەكەنىن ەسكەرسەك، يرانعا كۇن سايىن شامامەن 15 ميلليون ليتر بەنزين يمپورتتاۋ قاجەت.
بۇعان دەيىن يران پارسى شىعاناعىنداعى حارك ارالىنىڭ باتىس تەرمينالىندا 25 كۇنگە سوزىلعان تولىق توقتاۋدان كەيىن مۇناي تيەۋ جۇمىستارىن قايتا باستاعان.
