قاراعاندىدا سپورت كۇنىنە وراي پاراليمپيادا جانە سۋردليمپيادا ويىندارىنىڭ جەڭىمپازدارى مەن جۇلدەگەرلەرىنە ەرەكشە قۇرمەت كورسەتىلدى.
التى سپورتشىعا جاڭا پاتەرلەردىڭ كىلتى تابىستالدى. جاڭا قونىس يەلەرى داستان مۇقاشبەكوۆ، دايانا فەدوسوۆا، ەركەبۇلان قانافين، ايان ءابدىراش، ايجامول ابديكاتوۆا جانە ايدا ماقاتوۆا اتاندى.
سالتاناتتى شارا دوستىق ۇيىندە ءوتتى. جيىن بارىسىندا سپورتشىلارعا، جاتتىقتىرۋشىلارعا جانە سالا ارداگەرلەرىنە قۇرمەت كورسەتىلىپ، ولاردىڭ ەل سپورتىنىڭ دامۋىنا قوسقان ۇلەسى اتاپ ءوتىلدى.
– بۇگىندە قاراعاندى وبلىسىنىڭ مىڭنان استام وكىلى ەلىمىزدىڭ ۇلتتىق قۇراما كوماندالارىنىڭ ساپىندا. العا قاراي نىق قادام باسۋ ءۇشىن جەكەلەگەن سپورت نىساندارىن سالۋدان زاماناۋي سپورتتىق ورتا قالىپتاستىرۋعا جانە كلاستەرلىك تاسىلگە كوشىپ جاتىرمىز. سونىمەن قاتار سپورتتىڭ بارشاعا قولجەتىمدى بولۋى اسا ماڭىزدى. وسىعان بايلانىستى ينكليۋزيۆتى باعىتقا ەرەكشە ءمان بەرەمىز. باستى ماقساتىمىز – سپورت سەكتسياسىنا العاش كەلگەن بالادان باستاپ، قازاقستاننىڭ نامىسىن ءىرى حالىقارالىق جارىستاردا قورعايتىن سپورتشىعا دەيىن ءار ازاماتقا قولايلى جاعداي جاساۋ، – دەدى وبلىس اكىمىنىڭ ورىنباسارى الىبەك الدەنەي.
سۋردوتاەكۆوندوشى ايان ءابدىراش تا قۋانىشىمەن ءبولىستى. قازاقستاننىڭ سپورت شەبەرى تاەكۆوندومەن 18 جىلدان بەرى اينالىسىپ كەلەدى. سۋردليمپيادا ويىندارىندا بىرنەشە مارتە ۇزدىك ناتيجە كورسەتىپ، ءبىر التىن جانە ەكى قولا مەدال يەلەنگەن.
– مەن تاەكۆوندونى سپورتتىڭ ەرەكشە ءارى سۇيىكتى ءتۇرى رەتىندە باعالايمىن. بۇل سپورتقا مەنى اتا-انام الىپ كەلدى. العاشقى كەزدەن-اق جاتتىعۋعا قىزىعۋشىلىعىم ارتىپ، ناتيجەلەرىم دە بىرتىندەپ جاقسارا باستادى. جەڭىستەرگە جەتۋ ءۇشىن تىنىمسىز جاتتىقتىم. بۇگىنگى قولداۋ مەن قامقورلىق ءۇشىن شىن جۇرەكتەن العىس ايتامىن. وبلىس اكىمدىگىنە جانە دەنە شىنىقتىرۋ جانە سپورت باسقارماسىنا زور ريزاشىلىعىمدى بىلدىرەمىن، – دەدى ايان ءابدىراش.
سالتاناتتى شارا بارىسىندا سپورت سالاسىنىڭ ۇزدىك وكىلدەرىنە قۇرمەت گراموتالارى مەن العىس حاتتار تابىستالدى.
بيىل سپورتتا جوعارى جەتىستىكتەرگە جەتكەن ازاماتتارمەن بىرگە ولاردىڭ جەڭىسىنە ءاردايىم دەمەۋ بولعان اتا-انالارى دا نازاردان تىس قالماي، ماراپاتقا يە بولدى.
سونداي-اق سپورت ارداگەرلەرىنە ايرىقشا قۇرمەت كورسەتىلىپ، ولارعا ارنايى سىيلىقتار تابىس ەتىلدى.
