پرەزيدەنت قاسىم-جومارت توقاەۆتىڭ جارلىقتارىمەن بىرقاتار ماڭىزدى مەملەكەتتىك ورگان مەن ينستيتۋتتىڭ باسشىلىعىنا جاڭا تۇلعالار تاعايىندالدى. بۇل تۋرالى اقورردا جازدى، دەپ حابارلايدى "ادىرنا".
اتاپ ايتقاندا، ۇلتتىق بانك پەن ۇلتتىق قاۋىپسىزدىك كوميتەتىن، سونداي-اق جوعارى سوت كەڭەسى مەن ادام قۇقىقتارى جونىندەگى ۋاكىل ينستيتۋتىن باسقاراتىن جاڭا تۇلعالار انىقتالدى.
مەملەكەت باسشىسىنىڭ جارلىعىمەن تيمۋر مۇراتۇلى سۇلەيمەنوۆ قازاقستان رەسپۋبليكاسى ۇلتتىق بانكىنىڭ توراعاسى بولىپ تاعايىندالدى.
سونداي-اق، مەملەكەت باسشىسىنىڭ جارلىعىمەن ەرمەك الدابەرگەنۇلى ساعىمباەۆ قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى لاۋازىمىنا تاعايىندالدى.
قازاقستان رەسپۋبليكاسى جوعارى سوت كەڭەسىنىڭ توراعاسى لاۋازىمىنا دميتري ميحايلوۆيچ مالاحوۆ تاعايىندالسا، ارتۋر ەرمەكۇلى لاستاەۆ قازاقستان رەسپۋبليكاسىنداعى ادام قۇقىقتارى جونىندەگى ۋاكىل لاۋازىمىنا تاعايىندالدى.
