فوتو:FlyArystan
الماتىدان استاناعا ۇشۋى ءتيىس FlyArystan اۋە كومپانياسىنىڭ FS7063 رەيسى 1 ساعات 52 مينۋتقا كەشىكتى. بۇعان بورتتاعى جولاۋشىلاردىڭ ءبىرىن رەيستەن ءتۇسىرۋ جانە قاۋىپسىزدىك تالاپتارىنا سايكەس بارلىق جولاۋشىنى قايتا تەكسەرۋ قاجەتتىلىگى سەبەپ بولعان، دەپ حابارلايدى "ادىرنا" ۇلتتىق پورتالى Tengri Travel-گە سىلتەپ.
وقيعا 24 تامىز كۇنى رەيس ۇشار الدىندا بولعان. الەۋمەتتىك جەلىدە جولاۋشىلاردىڭ ءبىرى قول جۇگىنىڭ بەلگىلەنگەن سالماقتان 400 گرامم ارتىق بولعانى ءۇشىن جانجال شىققانىن جازدى. ونىڭ ايتۋىنشا، جولاۋشى ارتىق جۇك ءۇشىن 11 مىڭ تەڭگە تولەگەنىمەن، كەيىن رەيستەن شىعارىلعان.
وسىدان سوڭ ۇشاقتاعى 200-دەن استام جولاۋشىدان بورتتان شىعۋ سۇرالىپ، بارلىعى قايتادان قاۋىپسىزدىك تەكسەرۋىنەن وتكەن.
FlyArystan كومپانياسى رەيستىڭ كەشىككەنىن راستادى. اۋە تاسىمالداۋشىسىنىڭ مالىمەتىنشە، جولاۋشى بەلگىلەنگەن تاسىمالداۋ ەرەجەلەرىن بۇزىپ، تارتىپسىزدىك تانىتقان.
«ۇشۋ قاۋىپسىزدىگىن قامتاماسىز ەتۋ ماقساتىندا اۋە كەمەسىنىڭ كومانديرى بۇل جولاۋشىنى تاسىمالداۋدان باس تارتۋ تۋرالى شەشىم قابىلدادى»، – دەپ ءتۇسىندىردى كومپانيانىڭ ءباسپاسوز قىزمەتى.
اۋە كومپانياسىنىڭ حابارلاۋىنشا، جولاۋشى رەيستەن شىعارىلعاننان كەيىن ەكيپاج بەن اۆياتسيالىق قاۋىپسىزدىك قىزمەتى ءتيىستى پروتسەدۋرالاردى جۇرگىزگەن. قاۋىپسىزدىك تالاپتارىنا سايكەس، بارلىق جولاۋشى ۇشاقتان ءتۇسىرىلىپ، اۋە كەمەسىنە قايتادان ۇشۋ الدىنداعى تەكسەرۋ جۇرگىزىلگەن.
قاجەتتى راسىمدەر اياقتالعاننان كەيىن جولاۋشىلار بورتقا قايتا وتىرعىزىلعان.
ناتيجەسىندە FS7063 رەيسى جوسپارلانعان ۋاقىتتان 1 ساعات 52 مينۋت كەش ۇشقان. FlyArystan جولاۋشىلاردان تۋىنداعان قولايسىزدىقتار ءۇشىن كەشىرىم سۇرادى.
كومپانيا وكىلدەرى مۇنداي جاعدايدا ۇشۋ قاۋىپسىزدىگىنە قاتىستى بەلگىلەنگەن پروتسەدۋرالاردى ورىنداۋ مىندەتتى ەكەنىن اتاپ ءوتتى.
