foto:FlyArystan
Almatydan Astanaǧa ūşuy tiıs FlyArystan äue kompaniiasynyŋ FS7063 reisı 1 saǧat 52 minutqa keşıktı. Būǧan borttaǧy jolauşylardyŋ bırın reisten tüsıru jäne qauıpsızdık talaptaryna säikes barlyq jolauşyny qaita tekseru qajettılıgı sebep bolǧan, dep habarlaidy "Adyrna" ūlttyq portaly Tengri Travel-ge sıltep.
Oqiǧa 24 tamyz künı reis ūşar aldynda bolǧan. Äleumettık jelıde jolauşylardyŋ bırı qol jügınıŋ belgılengen salmaqtan 400 gramm artyq bolǧany üşın janjal şyqqanyn jazdy. Onyŋ aituynşa, jolauşy artyq jük üşın 11 myŋ teŋge tölegenımen, keiın reisten şyǧarylǧan.
Osydan soŋ ūşaqtaǧy 200-den astam jolauşydan borttan şyǧu sūralyp, barlyǧy qaitadan qauıpsızdık tekseruınen ötken.
FlyArystan kompaniiasy reistıŋ keşıkkenın rastady. Äue tasymaldauşysynyŋ mälımetınşe, jolauşy belgılengen tasymaldau erejelerın būzyp, tärtıpsızdık tanytqan.
«Ūşu qauıpsızdıgın qamtamasyz etu maqsatynda äue kemesınıŋ komandirı būl jolauşyny tasymaldaudan bas tartu turaly şeşım qabyldady», – dep tüsındırdı kompaniianyŋ baspasöz qyzmetı.
Äue kompaniiasynyŋ habarlauynşa, jolauşy reisten şyǧarylǧannan keiın ekipaj ben aviasiialyq qauıpsızdık qyzmetı tiıstı proseduralardy jürgızgen. Qauıpsızdık talaptaryna säikes, barlyq jolauşy ūşaqtan tüsırılıp, äue kemesıne qaitadan ūşu aldyndaǧy tekseru jürgızılgen.
Qajettı räsımder aiaqtalǧannan keiın jolauşylar bortqa qaita otyrǧyzylǧan.
Nätijesınde FS7063 reisı josparlanǧan uaqyttan 1 saǧat 52 minut keş ūşqan. FlyArystan jolauşylardan tuyndaǧan qolaisyzdyqtar üşın keşırım sūrady.
Kompaniia ökılderı mūndai jaǧdaida ūşu qauıpsızdıgıne qatysty belgılengen proseduralardy oryndau mındettı ekenın atap öttı.
