ارمەنيا اۋماعىنداعى رەسەيدىڭ 102-ءشى اسكەري بازاسىنىڭ بولۋى ماسەلەسى رەسەي پرەزيدەنتى ۆلاديمير پۋتينمەن بىشكەكتە وتكەن كەزدەسۋدە تالقىلانبادى. بۇل تۋرالى ارمەنيا پرەمەر-ءمينيسترى نيكول پاشينيان مالىمدەدى، دەپ حابارلايدى «ادىرنا» ءتىلشىسى ينتەرفاكسقا سىلتەمە جاساپ.
«اسكەري بازا تۋرالى ەشقانداي تالقىلاۋ بولعان جوق. وسى ۋاقىت ارالىعىندا ءبىز بۇل ماسەلەنى ەشقاشان كوتەرگەن ەمەسپىز. سونىمەن قاتار ارمەنيا اۋماعىنداعى 102-ءشى اسكەري بازانىڭ بولۋى ءبىز ءۇشىن ومىرلىك ماڭىزى بار قاجەتتىلىك دەپ تە سانامايمىز»، – دەدى پاشينيان جۋرناليستەرگە ارنالعان بريفينگتە.
ونىڭ ايتۋىنشا، ەگەر رەسەي بازانى ارمەنيادان شىعارۋ تۋرالى شەشىم قابىلداسا، ەرەۆان وعان قارسى بولمايدى.
«ەگەر رەسەي تاراپى بازانىڭ قالۋىن قالاسا، ءبىز بۇل ماسەلەنى دە تالقىلاۋعا دايىنبىز. بىراق ءبىز مۇنداي سۇراقتى ەشقاشان كوتەرگەن جوقپىز»، – دەپ قوستى پرەمەر-مينيستر.
رەسەيدىڭ 102-ءشى اسكەري بازاسى ارمەنيانىڭ سولتۇستىگىندەگى گيۋمري قالاسىندا 1995 جىلدان بەرى ورنالاسقان. 2011 جىلى اتالعان بازانىڭ رەسپۋبليكا اۋماعىندا بولۋ مەرزىمى 2044 جىلعا دەيىن ۇزارتىلعان.
