ەنەرگەتيكا ءمينيسترى ەرلان اقكەنجەنوۆ جاپونيانىڭ ەكونوميكا، ساۋدا جانە ونەركاسىپ ۆيتسە-ءمينيسترى كەندجي يامادامەن كەزدەسۋ وتكىزدى. بۇل تۋرالى 8 قىركۇيەكتە مينيسترلىكتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەزدەسۋ بارىسىندا تاراپتار قازاقستان مەن جاپونيا اراسىنداعى ەنەرگەتيكا جانە ەكونوميكا سالالارىنداعى ىنتىماقتاستىقتىڭ قازىرگى جاعدايى مەن دامۋ پەرسپەكتيۆالارىن، سونداي-اق جوعارى دەڭگەيدە قول جەتكىزىلگەن ۋاعدالاستىقتاردى ودان ءارى ىسكە اسىرۋ ماسەلەلەرىن تالقىلاعان. مۇناي-گاز سالاسىنداعى ءوزارا ءىس-قيمىلعا، ونىڭ ىشىندە مۇناي وڭدەۋ ينفراقۇرىلىمىن دامىتۋ، ينۆەستيتسيالار تارتۋ جانە زاماناۋي تەحنولوگيالاردى ەنگىزۋ ماسەلەلەرىنە ەرەكشە نازار اۋدارىلعان.
«ەرلان اقكەنجانوۆ قازاقستاننىڭ ەلەۋلى تەحنولوگيالىق جانە ينۆەستيتسيالىق الەۋەتكە يە جاپوندىق سەرىكتەستەرمەن ۇزاق مەرزىمدى ىنتىماقتاستىقتى كەڭەيتۋگە مۇددەلى ەكەنىن اتاپ ءوتتى. ءوز كەزەگىندە قازاقستان ايتارلىقتاي رەسۋرستىق بازاعا، ءتيىمدى گەوگرافيالىق ورنالاسۋعا يە جانە ءىرى ينۆەستيتسيالىق جوبالاردى ىسكە اسىرۋ ءۇشىن قاجەتتى جاعدايلار قالىپتاستىرۋدا.
كەلىسسوزدەر بارىسىندا جاڭارتىلاتىن ەنەرگيا كوزدەرى جانە تومەن كومىرتەكتى دامۋ سالالارىنداعى ىنتىماقتاستىقتى دامىتۋعا دا ەرەكشە كوڭىل ءبولىندى. قازاقستان جاپوندىق كومپانيالاردى جاڭارتىلاتىن ەنەرگيا كوزدەرى جوبالارىن ىسكە اسىرۋعا ودان ءارى تارتۋعا، سونداي-اق ەكىجاقتى كليماتتىق جانە تەحنولوگيالىق باستامالار شەڭبەرىندەگى ىنتىماقتاستىقتى دامىتۋعا مۇددەلى»،– دەلىنگەن حابارلامادا.
تاراپتار ەلەكتر ەنەرگەتيكاسىن دامىتۋ، ەنەرگەتيكالىق ينفراقۇرىلىمدى جاڭعىرتۋ جانە ەنەرگيامەن جابدىقتاۋ سەنىمدىلىگىن ارتتىرۋ ماسەلەلەرى بويىنشا دا پىكىر الماسقان.
كەزدەسۋ قورىتىندىسى بويىنشا تاراپتار سىندارلى ديالوگتى جالعاستىرۋعا جانە قازاقستان مەن جاپونيا اراسىنداعى ەنەرگەتيكا سالاسىنداعى ارىپتەستىكتى ودان ءارى نىعايتۋعا مۇددەلى ەكەندەرىن راستاعان.
