ماڭعىستاۋ وبلىسىندا وتكەن ايتىستا ايتقان ءسوزى ءۇشىن اقىن ماقسات اقانوۆ الداعى التى اي بويى ايتىستارعا قاتىستىرىلمايدى. بۇل تۋرالى ايتىس وداعىنىڭ توراعاسى امانجول ءالتاي مالىمدەدى، دەپ حابارلايدى "ادىرنا".
بۇعان دەيىن الەۋمەتتىك جەلىدە اقىننىڭ شايىر اۋىلىنداعى ايتىستا سويلەگەن سوزىنەن ءۇزىندى تاراعان ەدى. ۆيدەوعا قاتىستى نۇرگۇل حاسانوۆا پىكىر ءبىلدىرىپ، اقىننىڭ ءسوزىن ساحنا مادەنيەتى مەن ايتىس ادەبىنە قايشى دەپ سىنادى.
“مىناۋ نە ماسقارا، نە كورگەنسىزدىك! كۇنى كەشە شايىر اۋىلىنىڭ 100 جىلدىعىندا بولعان جاعداي» دەيدى. «ۆاتساپ» ارقىلى كەلىپ جاتىر. اياعى لاس ءتوردى بىلعايدى، اۋزى لاس ەلدى بىلعايدى» دەگەن، اۋزىنا كەلگەنىن كوكىپ وتىرعان مىنانى جەلكەلەپ ساحنادان قۋىپ شىعاتىن ءبىر نامىستى ادام بولماعانى ما سول جەردە؟! ءجۇز جەردەن «جۇلدىز»، مىڭ جەردەن ء«دۇلدۇل» بولسا دا! مىناۋ نە باسىنۋ، نە تايراڭداۋ؟! ايتىستىڭ ادەبى، ساحنا مادەنيەتى قايدا؟! ايتىستى ۇيىمداستىرۋشىلار مەن قازىلار القاسى نە قاراپ وتىر؟! ەلدى سىيلاماۋ، جەردى قورلاۋ، تۇتاس حالىقتى ادام قۇرلى كورمەي، ار-نامىسىن تاپتاۋ عوي بۇل!” – دەپ جازدى ول.
ونىڭ بۇل سوزىنە قوسىلىپ، اقىندى قاتتى سىناعاندار بولدى. ال ايتىس وداعىنىڭ توراعاسى امانجول ءالتاي بۇل ايتىس وداقتىڭ جوسپارىندا بولماعانىن، شايىر اۋىلىندا بولعان ايتىس ەكەنىن جەتكىزدى.
“جەكە كاسىپكەرلەردىڭ دەمەۋشىلىگىمەن سول ءوڭىردىڭ ازاماتتارىنىڭ ۇيىمداستىرۋىمەن وتكەن. ءبىزدىڭ قاتىسىمىز جوق. ءوزىم ۇيىمداستىرعان، قاداعالاعان ايتىستاردا ساحنا مادەنيەتىنىڭ ساقتالۋىنا، اقىنداردىڭ ادەبىنە ەرەكشە ءمان بەرىلەدى. ماقسات اقانوۆتى الداعى جارتى جىلدا ايتىستارعا قاتىستىرماۋ جونىندە شەشىم قابىلداندى. شايىر اۋىلىندا ورىن العان كەلەڭسىزدىك ءبىزدىڭ دە قابىرعامىزعا باتۋدا. ءبىر اقىننىڭ قاتەلىگى ءۇشىن بارلىق اقىن كىنالى ەمەس. ءوزىم ۇيىمداستىرعان، باسى – قاسىندا بولعان ايتىستاردا مۇنداي كەلەڭسىز جاعدايلار ەشقاشان بولعان ەمەس”، – دەدى ول.
