كاسپي تەڭىزىنىڭ قازاقستاندىق سەكتورىندا 24 قىركۇيەكتە قايعىلى جاعدايمەن اياقتالعان اسكەري وقۋ-جاتتىعۋ ەكى كۇن بۇرىن باستالعان، دەپ حابارلايدى “ادىرنا”.
22 قىركۇيەكتە قازاقستان قورعانىس مينيسترلىگى اسكەري-تەڭىز كۇشتەرىنىڭ «حازار قورعانى-2026» وقۋ-جاتتىعۋى باستالعانىن حابارلاعان.
ۆەدومستۆونىڭ مالىمەتىنشە، وقۋ-جاتتىعۋ ستراتەگيالىق كوماندالىق-شتابتىق وقۋ-جاتتىعۋدىڭ بىرىڭعاي جوسپارى اياسىندا وتكىزىلگەن. مانەۆرلەرگە اسكەري-تەڭىز كۇشتەرى مەن وعان باعىنىستى بولىمشەلەردىڭ 500-دەن استام اسكەري قىزمەتشىسى، اسكەري كەمەلەردىڭ ەكيپاجدارى مەن جاعالاۋ بولىمشەلەرى قاتىستى. سونداي-اق ۇقك شەكارا قىزمەتىنىڭ ماڭعىستاۋ وبلىسى بويىنشا جاعالاۋ كۇزەتى مەن اۋە قورعانىسى كۇشتەرىنىڭ بولىمشەلەرى تارتىلعان.
وقۋ-جاتتىعۋعا اسكەري-تەڭىز كۇشتەرىنىڭ باس قولباسشىسى، 1-دارەجەلى كاپيتان قانات نيازبەكوۆ جەتەكشىلىك ەتكەن.
قورعانىس مينيسترلىگى سول كەزدە وقۋ-جاتتىعۋدىڭ نەگىزگى ماقساتى جەكە قۇرامنىڭ كاسىبي دايارلىعىن جەتىلدىرۋ، ەكيپاجداردىڭ جاۋىنگەرلىك ازىرلىگىن ارتتىرۋ جانە كۇشتەر مەن قۇرالداردىڭ ءوزارا ءىس-قيمىلىن پىسىقتاۋ ەكەنىن حابارلاعان.
ال 24 قىركۇيەكتە وقۋ-جاتتىعۋ كەزىندە كاسپي تەڭىزىنە 19 اسكەري قىزمەتكەردى اعىس الىپ كەتكەن. قورعانىس مينيسترلىگىنىڭ مالىمەتىنشە، توعىز اسكەري قىزمەتكەر قازا تاپقان، ۇشەۋى قۇتقارىلعان. ولاردىڭ بىرەۋى اۋرۋحاناعا جاتقىزىلدى. قالعان اسكەري قىزمەتشىلەردى ىزدەستىرۋ جۇمىستارى جالعاسىپ جاتىر.
وقيعا ورنىنا قۇتقارۋ قىزمەتتەرىنىڭ كۇشتەرى مەن قۇرالدارى جىبەرىلىپ، ىزدەستىرۋ-قۇتقارۋ جۇمىستارىنا اسكەري-تەڭىز كۇشتەرى، توتەنشە جاعدايلار مينيسترلىگىنىڭ بولىمشەلەرى مەن اۆياتسيا تارتىلعان. قورعانىس مينيسترلىگى وقيعانىڭ ءمان-جايى بويىنشا تەرگەۋ جۇرگىزىلىپ جاتقانىن حابارلادى.
