بۇگىن، 27 قىركۇيەكتە پرەزيدەنت قاسىم-جومارت توقاەۆ قارىم-قابىلەتىمەن، اقىل-پاراساتىمەن جانە قاجىرلى ەڭبەگىمەن قاستەرلى وتانىمىزدىڭ ءوسىپ-وركەندەۋىنە زور ۇلەس قوسىپ جۇرگەن ءتۇرلى ماماندىق يەلەرىن قۇتتىقتادى. بۇل تۋرالى اقوردا جازدى، دەپ حابارلايدى "ادىرنا".
پرەزيدەنت ءوز ءىسىن جەتىك مەڭگەرگەن كاسىبي مامان بولۋ – قازىرگى زاماننىڭ اسا ماڭىزدى تالابى ەكەنىن باسا اتاپ ءوتتى. بىلىكتى، جاۋاپكەرشىلىگى جوعارى، ەڭبەكقور جانە ءتارتىپتى ازاماتتاردىڭ ارقاسىندا كوپتەگەن ەلدەر، سونىڭ ىشىندە قازاقستان دا الەۋمەتتىك-ەكونوميكالىق تۇرعىدان مول تابىسقا جەتۋدە.
"الەم حالىقتارىنا ورتاق "ەڭبەك – ءبارىن جەڭبەك" ناقىل ءسوزىنىڭ ءمانى زور، ماعىناسى تەرەڭ. تاباندى ەڭبەك – جەتىستىككە جەتۋدىڭ كوزى. ادال نيەتپەن اتقارىلعان ءاربىر ءىس – قادىرلى، كەز كەلگەن ەڭبەك – زور قۇرمەتكە لايىق. بۇگىنگى تاڭدا قازاقستان جاڭا تاريحي كەزەڭگە قادام باستى. الدىمىزدا اۋقىمدى مىندەتتەر تۇر. كونستيتۋتسيامىز جانە وندا ايقىن كورىنىس تاپقان ادىلەتتى قازاقستان، زاڭعا باعىنۋ، بىرلىك پەن ىنتىماق، ەڭبەكقورلىق پەن ىلگەرىلەۋ، تابيعاتقا قامقورلىقپەن قاراۋ يدەيالارى – ەلىمىزدىڭ تۇراقتى دامۋىنا جول اشاتىن تەمىرقازىق. قازىر قوعامىمىزدا "ادال ادام – ادال ەڭبەك – ادال تابىس" اتتى جاڭا ەتيكا قالىپتاستى", - دەدى مەملەكەت باسشىسى.
پرەزيدەنت بىلتىر جۇمىسشى ماماندىقتار جىلىن اتاپ وتكەنىمىزدى دە ەسكە سالدى. بۇل باستاما ەڭبەك ادامىنىڭ قوعامداعى مارتەبەسىن ارتتىرىپ، تالىمگەرلىك ءداستۇرى مەن ەڭبەك اۋلەتتەرىنىڭ ءمان-ماڭىزىن نىعايتا تۇسۋگە تىڭ سەرپىن بەردى.
"مەملەكەت الداعى ۋاقىتتا دا ازاماتتارىمىزدىڭ جان-جاقتى دامۋى ءۇشىن قولايلى جاعداي جاساي بەرەدى. جاستارعا كاسىبي ءبىلىم بەرۋ، ولاردىڭ ەڭبەك داعدىلارىن ۇشتاۋ، سونداي-اق، وسكەلەڭ ۇرپاقتىڭ بويىنا اعا بۋىننىڭ باي ومىرلىك تاجىريبەسى مەن تاعىلىمىن ءسىڭىرۋ – اسا ماڭىزدى مىندەت. جاستارى جاسامپاز ەلدىڭ بولاشاعى دا جارقىن، دامۋى دا قارقىندى بولارى ايقىن. ءبىز ىنتىماعى جاراسقان، ماقسات-مۇددەسى ورتاق ءبىرتۇتاس ۇلت رەتىندە ادىلدىك، تابيعاتتى ايالاۋ، زاڭ ۇستەمدىگى، وركەندەۋ قۇندىلىقتارى جانە، ەڭ باستىسى، ەڭبەكقورلىق قاسيەتى ءىس جۇزىندە ورنىققان ەل بولامىز. مەن بۇعان كامىل سەنەمىن. قۇرمەتتى وتانداستار، بارشاڭىزعا مىقتى دەنساۋلىق، اماندىق جانە تولاعاي تابىس تىلەيمىن! ەلىمىز ءوسىپ-وركەندەي بەرسىن!", - دەدى قاسىم-جومارت توقاەۆ.
