بۇعان دەيىن اتىراۋ وبلىسىندا ءبىر وتباسىنىڭ جوعالۋىنا قاتىستى ءوز نۇسقاسىن ينتەرنەتتە تاراتقان «حاكەرگە» قاتىستى قىلمىستىق ءىس سوتقا جىبەرىلدى. بۇل تۋرالى ىشكى ىستەر ءمينيسترىنىڭ ورىنباسارى سانجار ءادىلوۆ مالىمدەدى، دەپ حابارلايدى «ادىرنا» ءتىلشىسى.
مينيستر ورىنباسارىنىڭ ايتۋىنشا، قىلمىستىق ءىس بويىنشا تەرگەۋ تولىق اياقتالعان.
«قازىرگى تاڭدا اتالعان قىلمىستىق ءىس بويىنشا ايىپتالۋشى سوتقا بەرىلدى. تەرگەۋ اياقتالدى. ونىڭ قانداي دا ءبىر مالىمەتتەرگە نەمەسە دەرەكقورلارعا قول جەتكىزۋ مۇمكىندىگى بولعان جوق»، – دەدى سانجار ءادىلوۆ قۇرىلتاي اياسىنداعى بريفينگتە.
ول كۇدىكتىنىڭ ەكستراديتسيالانعانىن جەتكىزدى.
«تۇركيا مەملەكەتىنەن ەكستراديتسيالادىق. قازىرگى تاڭدا الاياقتىققا قاتىستى 12 ەپيزود بويىنشا ايىپ تاعىلدى. وكىنىشكە قاراي، مۇنان ارتىق اقپارات بەرە المايمىن. سەبەبى مەنىڭ قۇقىعىم جوق»،— دەدى ءمينيستردىڭ ورىنباسارى
ەر ادام اتىراۋ وبلىسىندا ءبىر وتباسىنىڭ قاتىگەزدىكپەن ولتىرىلۋىنەن كەيىن الەۋمەتتىك جەلىلەردە كەڭىنەن تانىلدى. ءوزىن «اتىراۋلىق حاكەر» دەپ تانىستىرعان ول «جەكە تەرگەۋ جۇرگىزىپ جاتقانىن» ايتىپ، قوڭىراۋلاردىڭ دەرەكتەرىن، گەولوكاتسيا مالىمەتتەرىن جانە وزگە ادامداردىڭ جەكە دەرەكتەرىن جاريالاعان ۆيدەولار تاراتقان.
جەلىدە «اتىراۋلىق حاكەر» دەگەن اتپەن تانىلعان ازامات بۇعان دەيىن اتىراۋداعى وتباسىنىڭ جوعالۋىنا قاتىستى ءتۇرلى بولجامدارىن جاريالاپ، ىقتيمال كۇدىكتىلەردىڭ ەسىمدەرىن دە اتاعان. ونىڭ جازبالارى قوعامدا قىزۋ تالقىلانىپ، كوپشىلىكتىڭ نازارىن اۋدارعان ەدى. الايدا قۇقىق قورعاۋ ورگاندارى ونىڭ ۇستالۋىنا الەۋمەتتىك جەلىدەگى جاريالانىمدارىنىڭ قاتىسى جوق ەكەنىن مالىمدەگەن.
رەسمي ورىندار ونىڭ جيناعان اۋديتورياسىن پايدالانىپ، ءوزىنىڭ دۋبايدا تۇراتىنىن مالىمدەگەن كۇدىكتى جازىلۋشىلارىنا ينۆەستيتسيالىق جوبالار، ءىت كۋرستارى، اقشا شىعارۋعا كومەكتەسۋ، اككاۋنتتاردى بۇعاتتان شىعارۋ جانە تەحنيكا ساتۋ سەكىلدى ءتۇرلى «قىزمەتتەردى» ۇسىنعانىن حابارلاعان. سەنىم ارتقان ازاماتتار وعان قوماقتى قاراجات اۋدارعانىمەن، ۋادە ەتىلگەن قىزمەتتەردى الا الماعان دەلىنەدى. الدىن الا ەسەپ بويىنشا، ونىڭ ارەكەتتەرىنەن كەلگەن شىعىن كولەمى 13 ميلليون تەڭگەدەن اسادى.
ال "اتىراۋلىق حاكەردىڭ" ءىز كەسۋىنەن كەيىن ىزدەستىرىلىپ، شەتەلدە ۇستالعان ءبىر وتباسىنىڭ ءتورت مۇشەسىن ولتىرگەن سۇلتان سارسەماليەۆ تاياۋدا ءومىر بويىنا باس بوستاندىعىنان ايىرۋ جازاسىنا كەسىلگەن.
