Būǧan deiın Atyrau oblysynda bır otbasynyŋ joǧaluyna qatysty öz nūsqasyn internette taratqan «hakerge» qatysty qylmystyq ıs sotqa jıberıldı. Būl turaly Işkı ıster ministrınıŋ orynbasary Sanjar Ädılov mälımdedı, dep habarlaidy «Adyrna» tılşısı.
Ministr orynbasarynyŋ aituynşa, qylmystyq ıs boiynşa tergeu tolyq aiaqtalǧan.
«Qazırgı taŋda atalǧan qylmystyq ıs boiynşa aiyptaluşy sotqa berıldı. Tergeu aiaqtaldy. Onyŋ qandai da bır mälımetterge nemese derekqorlarǧa qol jetkızu mümkındıgı bolǧan joq», – dedı Sanjar Ädılov Qūryltai aiasyndaǧy brifingte.
Ol küdıktınıŋ ekstradisiialanǧanyn jetkızdı.
«Türkiia memleketınen ekstradisiialadyq. Qazırgı taŋda alaiaqtyqqa qatysty 12 epizod boiynşa aiyp taǧyldy. Ökınışke qarai, mūnan artyq aqparat bere almaimyn. Sebebı menıŋ qūqyǧym joq»,— dedı ministrdıŋ orynbasary
Er adam Atyrau oblysynda bır otbasynyŋ qatygezdıkpen öltırıluınen keiın äleumettık jelılerde keŋınen tanyldy. Özın «Atyraulyq haker» dep tanystyrǧan ol «jeke tergeu jürgızıp jatqanyn» aityp, qoŋyraulardyŋ derekterın, geolokasiia mälımetterın jäne özge adamdardyŋ jeke derekterın jariialaǧan videolar taratqan.
Jelıde «Atyraulyq haker» degen atpen tanylǧan azamat būǧan deiın Atyraudaǧy otbasynyŋ joǧaluyna qatysty türlı boljamdaryn jariialap, yqtimal küdıktılerdıŋ esımderın de ataǧan. Onyŋ jazbalary qoǧamda qyzu talqylanyp, köpşılıktıŋ nazaryn audarǧan edı. Alaida qūqyq qorǧau organdary onyŋ ūstaluyna äleumettık jelıdegı jariialanymdarynyŋ qatysy joq ekenın mälımdegen.
Resmi oryndar onyŋ jinaǧan auditoriiasyn paidalanyp, özınıŋ Dubaida tūratynyn mälımdegen küdıktı jazyluşylaryna investisiialyq jobalar, IT kurstary, aqşa şyǧaruǧa kömektesu, akkaunttardy būǧattan şyǧaru jäne tehnika satu sekıldı türlı «qyzmetterdı» ūsynǧanyn habarlaǧan. Senım artqan azamattar oǧan qomaqty qarajat audarǧanymen, uäde etılgen qyzmetterdı ala almaǧan delınedı. Aldyn ala esep boiynşa, onyŋ äreketterınen kelgen şyǧyn kölemı 13 million teŋgeden asady.
Al "Atyraulyq hakerdıŋ" ız kesuınen keiın ızdestırılıp, şetelde ūstalǧan bır otbasynyŋ tört müşesın öltırgen Sūltan Särsemäliev taiauda ömır boiyna bas bostandyǧynan aiyru jazasyna kesılgen.
