قر سىرتقى ىستەر ءمينيسترى مۇحتار تىلەۋبەردى رەسەيدىڭ قازاقستانداعى ۋاقىتشا سەنىمدى وكىلى الەكساندر كوماروۆپەن كەزدەستى. بۇل تۋرالى ءسىم 2 قازاندا حابارلادى، دەپ جازادى “ادىرنا”.
كەزدەسۋدە سوعىس قيمىلدارى ايماعىندا قالعان قازاقستان ازاماتتارىنىڭ جاعدايى تالقىلاندى.
تاراپتار قازاقستاندىق ازاماتتاردى ەلگە قايتارۋ بويىنشا بىرلەسكەن ءىس-قيمىلداردى ازىرلەۋ تۋرالى ۋاعدالاستى.
وسىدان كەيىن قر ءسىم ۆەدومستۆونىڭ رەسمي وكىلى جانبولات ۇسەنوۆتىڭ مالىمدەمەسىن جاريالادى.
ونىڭ ايتۋىنشا، بۇقارالىق اقپارات قۇرالدارىندا قازاقستان ازاماتتارىنىڭ ەلگە ورالۋىنا كومەك كورسەتۋ تۋرالى وتىنىشتەرى تارالىپ جاتىر.
«سىرتقى ىستەر مينيسترلىگى بۇل جاعدايعا بارىنشا بايىپپەن قارايدى. شەتەلدەگى قازاقستان ازاماتتارىنىڭ قۇقىقتارىن، بوستاندىقتارى مەن زاڭدى مۇددەلەرىن قورعاۋ – مينيسترلىك قىزمەتىنىڭ ءسوزسىز باسىمدىعى. قازاقستان رەسپۋبليكاسىنىڭ ءسىم الەمنىڭ ءتۇرلى ەلدەرى مەن وڭىرلەرىندەگى سوعىس ايماقتارىنان وتانداستارىمىزدى قايتارۋ بويىنشا پراكتيكالىق تاجىريبەگە يە»، – دەدى جانبولات ۇسەنوۆ.
ونىڭ مالىمدەمەسىندە قازاقستان ازاماتتارى تۋرالى تولىق ءارى ناقتى اقپاراتتى بۇقارالىق اقپارات قۇرالدارىنان ەمەس، ولاردىڭ وزدەرىنەن نەمەسە تۋىستارىنان تىكەلەي الۋ ماڭىزدى ەكەنى اتاپ وتىلگەن. قازىردىڭ وزىندە كەيبىر وتباسىلار مينيسترلىككە كومەك كورسەتۋ تۋرالى وتىنىشپەن جۇگىنگەن.
قر ءسىم اسكەري قيمىلدار ايماعىندا قالعان قازاقستاندىقتاردىڭ تۋىستارىنان وتىنىشتەر قابىلداۋ ءۇشىن ارنايى جەدەل جەلى جۇمىس ىستەيتىنىن حابارلادى.
«ازاماتتاردىڭ قۇقىقتىق قورعالۋىن قامتاماسىز ەتۋ ءۇشىن مينيسترلىككە ولاردىڭ اتى-ءجونى، تۋعان كۇنى، بولجامدى ورنالاسقان جەرى، سونداي-اق جاسالعان ەڭبەك كەلىسىمشارتتارىنىڭ تالاپتارى تۋرالى مالىمەتتەردى قوسا العاندا، تولىق اقپارات قاجەت»، – دەلىنگەن حابارلامادا.
قازىرگى ۋاقىتتا ءسىم قازاقستاندىقتاردى ەلگە قايتارۋ بويىنشا بىرلەسكەن شارالاردى ازىرلەۋ ءۇشىن رەسەي تاراپىمەن كونسۋلتاتسيالاردى جالعاستىرىپ جاتىر.
جاقىن ۋاقىتتا قازاقستاننىڭ رەسەيدەگى ەلشىسى رەسەي سىرتقى ىستەر مينيسترلىگى مەن قورعانىس مينيسترلىگىنىڭ باسشىلىعىمەن كەزدەسۋلەر وتكىزەدى.
مينيسترلىك جۇرگىزىلىپ جاتقان جۇمىستىڭ بارىسى مەن ناتيجەلەرى تۋرالى قوسىمشا اقپارات بەرىلەتىنىن مالىمدەدى.
