فوتو جي-مەن جاسالعان
پرەمەر-مينيستر ولجاس بەكتەنوۆ بالقاش جىلۋ ەلەكتر ورتالىعىنىڭ جۇمىسىمەن تانىستى، دەپ حابارلايدى “ادىرنا” ءتىلشىسى.
ۇكىمەتتىڭ مالىمەتىنشە، 2025 جىلدىڭ قورىتىندىسى بويىنشا قابىلدانعان شارالاردىڭ ناتيجەسىندە ستانسا اپاتتى «قىزىل ايماقتان» شىعارىلعان. بيىل نەگىزگى جابدىقتاردى جوندەۋگە بولىنگەن 3,2 ملرد تەڭگە كولەمىندەگى جۇمىستار تولىق اياقتالدى.
قازىر جالپى قۇنى 30,3 ملرد تەڭگە بولاتىن №5 قازاندىق اگرەگاتىن سالۋ جۇمىستارى جالعاسىپ جاتىر. نەگىزگى جابدىقتاردى مونتاجداۋ اياقتالعان. قازاندىق تسەحىنىڭ عيماراتى مەن وتىن بەرۋ تراكتى سالىندى. سونداي-اق زاماناۋي گاز تازارتۋ جابدىعىن جوبالاۋ جۇمىستارى جۇرگىزىلۋدە.
جوبا ىسكە قوسىلعاننان كەيىن ورتالىقتىڭ بۋ ءوندىرۋ قۋاتى ساعاتىنا 270 تونناعا ارتادى. كەلەسى كەزەڭدە قۇنى 28,7 ملرد تەڭگە بولاتىن №5 تۋربواگرەگاتتى ورناتۋ جوسپارلانعان. بۇل ستانسانىڭ ەلەكتر قۋاتىن 65 مۆت-قا، جىلۋ قۋاتىن ساعاتىنا 55 گكال-عا ارتتىرۋعا مۇمكىندىك بەرەدى.
جوبانى 2028 جىلدىڭ سوڭىنا دەيىن اياقتاۋ كوزدەلگەن.
