پرەمەر-مينيستر ولجاس بەكتەنوۆ ۇكىمەتتىڭ جاڭا قۇرامىنا ۇندەۋ جاساپ، مەملەكەتتىك ورگاندار الدىنا قويىلعان مىندەتتەردى جۇيەلى تۇردە جۇزەگە اسىرۋعا جانە شەشىمدەردى جەدەل قابىلداۋعا شاقىردى، دەپ حابارلايدى "ادىرنا" ۇلتتىق پورتالى.
بۇل تۋرالى ۇكىمەت باسشىسى مينيسترلەر كابينەتىنىڭ وتىرىسىندا ايتتى.
ولجاس بەكتەنوۆ جاڭا كونستيتۋتسيانىڭ كۇشىنە ەنۋى ەلدىڭ ساياسي جانە ەكونوميكالىق جاڭعىرۋىنا جول اشقان تاريحي كەزەڭ ەكەنىن اتاپ ءوتتى. وسىعان بايلانىستى ۇكىمەت ەلىمىزدىڭ الەۋمەتتىك-ەكونوميكالىق دامۋىن قامتاماسىز ەتۋ ءۇشىن كەشەندى شارالار قابىلداۋى قاجەت ەكەنىن ايتتى.
«بارلىق باعىت پەن سالالار بويىنشا مەملەكەت باسشىسى قويعان مىندەتتەردى جۇيەلى ءارى كەشەندى تۇردە جۇزەگە اسىرۋ قاجەت»، – دەدى پرەمەر-مينيستر.
ۇكىمەت باسشىسى مەملەكەتتىك ورگاندار جۇمىسىنىڭ نەگىزىندە «زاڭ مەن ءتارتىپ» جانە «تازا قازاقستان» كونستيتۋتسيالىق قاعيداتتارى تۇرۋى ءتيىس ەكەنىن اتاپ ءوتتى.
سونىمەن قاتار ول ۇكىمەت جۇمىسى وزىق قارقىنمەن جۇرگىزىلىپ، ناقتى ناتيجەگە باعىتتالۋى كەرەكتىگىن ايتتى.
«قازىر تولىق جاۋاپكەرشىلىكتى موينىمىزعا الىپ، ناقتى ناتيجەلەرگە قول جەتكىزۋ ءۇشىن قاجەتتى شەشىمدەردى جەدەل قابىلدايتىن ۋاقىت. ءبارىمىز پرەزيدەنتتىڭ جوعارى سەنىمىن تولىعىمەن اقتاۋىمىز كەرەك»، – دەدى ولجاس بەكتەنوۆ
