جاپونيانىڭ ايتي پرەفەكتۋراسى مەن ناگويا قالاسىندا وتكەن حح ازيا ويىندارىندا ەل نامىسىن قورعاعان قازاق سپورت جانە تۋريزم اكادەمياسىنىڭ ستۋدەنت-سپورتشىلارىنا اكادەميادا قۇرمەت كورسەتىلدى.
19 قىركۇيەك پەن 4 قازان ارالىعىندا وتكەن حح ازيا ويىندارىنا ازيانىڭ 45 ەلى مەن ايماعىنان سپورتشىلار قاتىسىپ، قۇرلىقتىڭ ەڭ ءىرى سپورت دوداسىندا باق سىنادى.
ەل نامىسىن حالىقارالىق ارەنادا قورعاپ جۇرگەن سپورتشىلارعا تۇراقتى قولداۋ كورسەتۋ – قازاق سپورت جانە تۋريزم اكادەمياسىنىڭ پرەزيدەنتى قايرات قايرۋللاۇلى زاكيريانوۆتىڭ باستى نازارىنداعى باعىتتاردىڭ ءبىرى.
ازيادا-2026 دوداسىندا قازستا ستۋدەنتتەرى جوعارى ناتيجە كورسەتىپ، قازاقستان قورجىنىنا 2 التىن، 1 كۇمىس جانە 4 قولا مەدال قوستى.
سولاردىڭ قاتارىندا تاەكۆوندوشى تاميرلان تىلەۋلەس پەن سەمسەرلەسۋشى كيريلل پروحودوۆ ازيا ويىندارىنىڭ چەمپيونى اتاندى. تاميرلان تىلەۋلەس تاەكۆوندودان تاريحي جەڭىسكە جەتسە، كيريلل پروحودوۆ سەمسەرلەسۋدەن قازاقستان قۇراماسىنىڭ ساپىندا التىن مەدال يەلەندى.
ال اليجان ابلاگاتوۆ ۋشۋ-ساندادان ازيا ويىندارىنىڭ قولا جۇلدەگەرى اتاندى. ونىڭ بۇل مەدالى قازاقستان ءۇشىن اتالعان سپورت تۇرىنەن ازيا ويىندارىنداعى العاشقى جۇلدە بولدى.
اكادەميا پرەزيدەنتى قايرات قايرۋللاۇلى زاكيريانوۆ ستۋدەنت-سپورتشىلاردىڭ جەتىستىگىن جوعارى باعالاپ، تاميرلان تىلەۋلەس پەن اليجان ابلاگاتوۆقا رەكتور گرانتىن تابىستادى. بۇعان دەيىن اقىلى بولىمدە ءبىلىم الىپ كەلگەن قوس سپورتشى ەندى وقۋىن تەگىن جالعاستىرادى.
بۇل شەشىم – قازستا-نىڭ سپورتتاعى جەتىستىكتى بىلىممەن ۇشتاستىرۋعا، تالانتتى جاستاردى قولداۋعا جانە ولاردىڭ كاسىبي دامۋىنا جاعداي جاساۋعا باعىتتالعان ناقتى قادامى.
شارانىڭ ەرەكشە ساتتەرىنىڭ ءبىرى – قازاق بوكسىنىڭ داڭقتى وكىلى، 1980 جىلعى ماسكەۋ وليمپياداسىنىڭ كۇمىس جۇلدەگەرى سەرىك قوناقباەۆتىڭ اكادەمياعا ارنايى كەلۋى بولدى.
سەرىك قوناقباەۆقا قازاق سپورت جانە تۋريزم اكادەمياسىنىڭ قۇرمەتتى پروفەسسورى اتاعى بەرىلدى. سونداي-اق وعان قازاقستان ۇلتتىق وليمپيادا كوميتەتىنىڭ جوعارى وردەنى گەننادي گولوۆكيننىڭ ۇسىنىسىمەن تابىستالدى.
قازاق بوكسىنىڭ اڭىز تۇلعاسىنىڭ اكادەمياعا كەلۋى جاس سپورتشىلار ءۇشىن ۇلكەن موتيۆاتسيا بولدى. سانالى عۇمىرىن سپورتقا ارناعان، تالاي بيىكتى باعىندىرعان سەرىك قوناقباەۆتىڭ ونەگەلى جولى – بۇگىنگى ستۋدەنتتەر ءۇشىن تاباندىلىق پەن ەلگە قىزمەت ەتۋدىڭ جارقىن ۇلگىسى.
سالتاناتتى شارا بارىسىندا دجيۋ-دجيتسۋدان ازيا ويىندارىنىڭ قولا جۇلدەگەرى جىبەك قۇلىمبەتوۆاعا دا العىس حات تابىستالدى.
قازستا ءۇشىن چەمپيونداردى ۇلىقتاۋ – تەك جەڭىستى اتاپ ءوتۋ ەمەس، جاس ۇرپاققا ۇلگى كورسەتۋ، ولاردىڭ ۇلكەن سپورتتاعى جولىنا قولداۋ ءبىلدىرۋ. بۇگىنگى جەڭىستەر – ستۋدەنت-سپورتشىلاردىڭ قاجىرلى ەڭبەگىنىڭ ناتيجەسى بولسا، اكادەميا تاراپىنان كورسەتىلگەن قولداۋ ولاردىڭ الداعى بيىكتەرىنە بەرىلگەن سەنىمنىڭ بەلگىسى.
