فوتو: جي كومەگىن جاسالدى
تۇركيا تۇركى مەملەكەتتەرىنىڭ قاتىسۋىمەن حالىقارالىق فۋتبول ءتۋرنيرىن وتكىزۋدى ۇسىندى. «تۇركى كۋبوگى» دەپ اتالاتىن جارىستى ەكى جىلدا ءبىر رەت ۇيىمداستىرۋ جوسپارلانىپ وتىر، دەپ حابارلايدى “ادىرنا” ۇلتتىق پورتالى Yeniakit-كە سىلتەمە جاساپ.
باستامانى تۇركيانىڭ بيلىكتەگى ادىلەت جانە دامۋ پارتياسى (AK Parti) توراعاسىنىڭ ورىنباسارى، تۇركى مەملەكەتتەرىمەن قارىم-قاتىناسقا جاۋاپتى كۇرشاد زورلۋ كوتەردى. ول بۇل ۇسىنىسىن تۇركيانىڭ كوجاەلي قالاسىندا وتكەن تۇركى الەمى جاستارىنىڭ كەزدەسۋىندە ايتقان.
زورلۋدىڭ سوزىنشە، ءتۋرنيردى ۇيىمداستىرۋ ماسەلەسىن تۇركيا فۋتبول فەدەراتسياسى مەن جاستار جانە سپورت مينيسترلىگى بىرلەسىپ پىسىقتاۋى قاجەت. جارىسقا قازاقستان، ازەربايجان، قىرعىزستان، وزبەكستان جانە وزگە دە تۇركى مەملەكەتتەرىنىڭ ۇلتتىق قۇرامالارى قاتىسۋى مۇمكىن.
باستامانىڭ نەگىزگى ماقساتى – مەملەكەتتەر اراسىنداعى سپورتتىق بايلانىستى نىعايتۋ، جاس تالانتتاردى انىقتاۋ جانە ولاردىڭ كاسىبي تۇرعىدا دامۋىنا مۇمكىندىك جاساۋ. ازىرگە ءتۋرنيردىڭ ناقتى مەرزىمى، وتكىزۋ فورماتى مەن قاتىسۋشى ەلدەردىڭ تۇپكىلىكتى ءتىزىمى بەلگىلەنگەن جوق.
سونىمەن قاتار كۇرشاد زورلۋ تۇركيادا ونەر كورسەتەتىن تۇركى مەملەكەتتەرىنىڭ فۋتبولشىلارىنا قاتىستى ەرەجەلەردى وزگەرتۋدى ۇسىندى. ونىڭ باستاماسىنا سايكەس، قازاقستان، ازەربايجان، قىرعىزستان جانە وزبەكستان ويىنشىلارىنا ەرەكشە مارتەبە بەرىلىپ، ولار لەگيونەرلەر قاتارىنا جاتقىزىلماۋى مۇمكىن.
قازىرگى ۋاقىتتا قازاقستان فۋتبولشىلارى تۇركيا كلۋبتارىندا شەتەلدىك ويىنشىلارعا ارنالعان ليميت اياسىندا ونەر كورسەتەدى.
ەگەر ۇسىنىس ماقۇلدانسا، قازاقستاندىق فۋتبولشىلارعا قويىلاتىن شەكتەۋلەر جەڭىلدەتىلۋى نەمەسە ولار لەگيونەرلەر ليميتىنەن بوساتىلۋى ىقتيمال. بۇل تۇركيا كلۋبتارىنىڭ قازاقستاندىق ويىنشىلارعا دەگەن قىزىعۋشىلىعىن ارتتىرۋى مۇمكىن.
الايدا تۇركيا فۋتبول فەدەراتسياسى ازىرگە بۇل ماسەلەگە قاتىستى رەسمي شەشىم قابىلداعان جوق. ەرەجەلەردىڭ ناقتى تالاپتارى مەن باستاماعا قاتىساتىن مەملەكەتتەردىڭ ءتىزىمى ءالى دە تالقىلانۋى ءتيىس.
