كوكشەتاۋدا رەسپۋبليكا كۇنىنە وراي مەملەكەتتىك تۋدى سالتاناتتى تۇردە كوتەرۋ ءراسىمى ءوتتى. ءىس-شاراعا اقمولا وبلىسىنىڭ اكىمى مارات احمەتجانوۆ قاتىستى.
قازاقستان رەسپۋبليكاسىنىڭ مەملەكەتتىك ءانۇرانى ورىندالعان ساتتە كوك بايراق كوككە كوتەرىلدى. ءانۇراندى «جاستار» ۆوكالدىق ستۋدياسىنىڭ سوليستەرى مەن «كوكشەتاۋ» مادەنيەت سارايىنىڭ شىعارماشىلىق ۇجىمدارىنىڭ بىرىككەن حورى ورىندادى. مەملەكەتتىك تۋدى مالىك عابدۋللين اتىنداعى ازاماتتىق قورعاۋ اكادەمياسىنىڭ كۋرسانتتارىنان قۇرالعان تۋ ۇستاۋشىلار توبى الىپ شىقتى.
جەرلەستەرىن ۇلتتىق مەرەكەمەن قۇتتىقتاعان ءوڭىر باسشىسى رەسپۋبليكا كۇنىنىڭ ەل تاريحىنداعى ايرىقشا ماڭىزىن اتاپ ءوتتى. ونىڭ ايتۋىنشا، مەملەكەتتىك ەگەمەندىك تۋرالى دەكلاراتسيا قازاقستاننىڭ تاۋەلسىزدىككە جەتۋ جولىنداعى ماڭىزدى تاريحي قادام بولدى.
«پرەزيدەنت قاسىم-جومارت كەمەلۇلى توقاەۆ رەسپۋبليكا كۇنىن حالقىمىزدىڭ تاۋەلسىز مەملەكەت بولىپ قالىپتاسۋىنا جول اشقان قاسيەتتى كۇن دەپ اتاپ ءوتتى. بۇگىندە قازاقستان اۋقىمدى جاڭعىرۋ كەزەڭىنەن وتۋدە. ونىڭ باستى ماقساتى — ازاماتتاردىڭ قۇقىقتارى مەن بوستاندىقتارىن قورعاۋ، زاڭ ۇستەمدىگىن نىعايتۋ جانە حالىقتىڭ ءال-اۋقاتىن ارتتىرۋ. اقمولا وبلىسى دا ەل دامۋىنا ءوز ۇلەسىن قوسىپ كەلەدى: ەكونوميكالىق الەۋەتىن ارتتىرىپ، ونەركاسىپ پەن اۋىل شارۋاشىلىعىن دامىتىپ، ينۆەستيتسيا تارتۋدا جانە جاڭا جۇمىس ورىندارىن اشۋدا. ءبىلىم بەرۋ مەن مەديتسينالىق قىزمەت ساپاسىن ارتتىرۋ، ينفراقۇرىلىمدى جەتىلدىرۋ جانە جاستارعا جاڭا مۇمكىندىكتەر جاساۋ — نەگىزگى باسىمدىقتارىمىز. ادىلەتتى قازاقستاندى قۇرۋ — ارقايسىمىزدىڭ ورتاق مىندەتىمىز. ءبىزدىڭ وتانىمىز ءبىر، مەملەكەتىمىز ءبىر، حالقىمىز ءبىر»، — دەدى مارات احمەتجانوۆ.
سالتاناتتى شارا اياسىندا ءوڭىردىڭ دامۋىنا، قوعامدىق قىزمەتكە، الەۋمەتتىك-ەكونوميكالىق جانە مادەني سالالاردىڭ وركەندەۋىنە، سونداي-اق دوستىق پەن ىنتىماقتاستىقتى نىعايتۋعا ەلەۋلى ۇلەس قوسقان اقمولالىقتارعا العىس حاتتار تابىستالدى.
