“ساقشى” جوباسىنىڭ جەڭىمپازدارى ماراپاتتالدى

235
Adyrna.kz Telegram
https://www.adyrna.kz/storage/uploads/ZmdoUrd1TMM7FtEEwrE5ULEWnelXkE668crEzVUe.jpg

تۇركىستان قالاسىنداعى «كونگرەسس حولل» كەشەنىندە «ساقشى» ينتەراكتيۆتى ويىنى مەن الەۋمەتتىك بەينەروليكتەر بايقاۋىنىڭ قورىتىندى ماراپاتتاۋ ءراسىمى ءوتتى.

ءتورت سانات بويىنشا 12 جۇلدەگەر انىقتالىپ، باعالى سىيلىقتارمەن ماراپاتتالدى. سونداي-اق بەينەروليكتەردى ازىرلەۋگە اتسالىسقان 150 وقۋشىعا العىس حاتتار مەن سىيلىقتار تابىستالدى.

سالتاناتتى ءىس-شاراعا تۇركىستان وبلىسىنىڭ اكىمى نۇرالحان كوشەروۆ، قازاقستان رەسپۋبليكاسى قارجىلىق مونيتورينگ اگەنتتىگىنىڭ پرەۆەنتسيا جانە تالداۋ ازىرلەمەلەرى دەپارتامەنتىنىڭ باسشىسى داۋرەن رايىمقۇلوۆ، تۇركىستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ باسشىسى سابىرعالي بالعاليەۆ، قۇقىق قورعاۋ ورگاندارى مەن ءبىلىم سالاسىنىڭ وكىلدەرى، ۇستازدار، اتا-انالار جانە جاستار قاتىستى.

وبلىس اكىمى جاستار اراسىندا زاڭعا قۇرمەت پەن جاۋاپكەرشىلىك مادەنيەتىن قالىپتاستىرۋدىڭ ماڭىزدىلىعىنا توقتالدى.

– مەملەكەت باسشىسى قاسىم-جومارت كەمەلۇلى توقاەۆ قوعامدا «زاڭ مەن ءتارتىپ» قاعيداتىن ورنىقتىرۋدى مەملەكەتتىك ساياساتتىڭ باسىم باعىتتارىنىڭ ءبىرى رەتىندە ايقىندادى. وسى ورايدا زاڭعا قۇرمەت وتباسىدان باستالىپ، مەكتەپتە جالعاسىپ، قوعامداعى كۇندەلىكتى قارىم-قاتىناستا كورىنىس تابۋى ءتيىس. تۇركىستان وبلىسىندا اتالعان باعىتتا كەشەندى جۇمىستار جۇرگىزىلۋدە. سونىڭ جارقىن ۇلگىسى – ەكونوميكالىق تەرگەپ-تەكسەرۋ دەپارتامەنتىنىڭ باستاماسىمەن جۇزەگە اسىرىلىپ جاتقان «ساقشى» يننوۆاتسيالىق پروفيلاكتيكالىق جوباسى. جوبا اياسىندا قارجىلىق قاۋىپسىزدىك، ينتەرنەت-الاياقتىقتان ساقتانۋ، قۇقىق بۇزۋشىلىقتىڭ الدىن الۋ ماسەلەلەرى كەڭىنەن قامتىلعان. قۇرمەتتى جاستار! بۇگىنگى تاڭدا ەرەكشە نازار اۋدارۋدى قاجەت ەتەتىن وزەكتى ماسەلەنىڭ ءبىرى – جاسوسپىرىمدەر مەن جاستار اراسىندا بۋللينگ فاكتىلەرىنىڭ الدىن الۋ. ومىردە ءتۇرلى قيىندىقتار مەن كەدەرگىلەر كەزدەسەدى. بىراق سولارعا مويىماي، العا ۇمتىلۋ ماڭىزدى. ءبىز جاستار اراسىندا ءوزارا سىيلاستىقتى، ءبىر-بىرىنە قولداۋ كورسەتۋ جانە قۇرمەتتەۋ مادەنيەتىن قالىپتاستىرۋىمىز قاجەت. بىلىمگە ۇمتىلماي، ءتارتىپ بۇزۋ مەن بۇزاقىلىققا بوي الدىرۋ – بولاشاققا بالتا شابۋمەن تەڭ. مۇنداي جاعىمسىز ارەكەتتەر اتا-انالارىڭنىڭ ءۇمىتىن ۇزەتىن، ولاردىڭ جۇرەگىن جارالايتىن ءىس. سوندىقتان زاڭ مەن ءتارتىپتى ساقتاپ، عىلىمعا، ونەرگە، سپورتقا ۇمتىلىڭىزدار! ءبىزدىڭ باستى ماقساتىمىز – زاڭدى قۇرمەتتەيتىن، ءوز قۇقىعى مەن مىندەتىن بىلەتىن، رۋحاني باي، باسەكەگە قابىلەتتى جانە جاۋاپكەرشىلىگى جوعارى ۇرپاق تاربيەلەۋ. بۇل باعىتتا مەملەكەتتىك جانە قۇقىق قورعاۋ ورگاندارى، ءبىلىم بەرۋ ۇيىمدارى، اتا-انالار مەن ازاماتتىق قوعام وكىلدەرى ءوزارا ۇيلەسىمدى جۇمىس ىستەۋى قاجەت. «ساقشى» جوباسى – وسى ماقساتتاعى جۇمىستىڭ ناتيجەلى ۇلگىسى. بۇگىنگى بايقاۋ جەڭىمپازدارى مەن جۇلدەگەرلەرىن شىن جۇرەكتەن قۇتتىقتايمىن! بارشاڭىزعا زور دەنساۋلىق، وتباسىلارىڭىزعا اماندىق، شىعارماشىلىق تابىس تىلەيمىن! – دەدى نۇرالحان كوشەروۆ.

«ساقشى» جوباسىن تۇركىستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتى «زاڭ مەن ءتارتىپ» قاعيداتى مەن «ادال ازامات» تۇجىرىمداماسى اياسىندا ازىرلەپ، ۇيىمداستىردى. ءىس-شارانى وتكىزۋگە تۇركىستان وبلىسى اكىمدىگى مەن ءبىلىم باسقارماسى قولداۋ كورسەتتى. باستامانىڭ نەگىزگى ماقساتى – وسكەلەڭ ۇرپاقتىڭ قارجىلىق قاۋىپسىزدىك داعدىلارىن قالىپتاستىرۋ، زاڭعا قۇرمەتپەن قاراۋعا ۇيرەتۋ جانە جەكە شەشىمدەرى ءۇشىن جاۋاپكەرشىلىگىن ارتتىرۋ.

 

ينتەراكتيۆتى ويىن بارىسىندا قاتىسۋشىلار كۇندەلىكتى ومىردە كەزدەسەتىن قارجىلىق قاۋىپتەردى تالداپ، الاياقتىق ارەكەتتەردى انىقتاۋ جولدارىن ۇيرەندى. ماسەلەن، «بانك كارتاڭدى بەرە تۇر، اقشا اۋدارعانىڭ ءۇشىن سىياقى الاسىڭ» دەگەن سەكىلدى كۇماندى ۇسىنىستاردىڭ استارىندا قانداي قاۋىپ جاتقانىن زەردەلەدى. وقۋشىلار مەن ستۋدەنتتەر جەكە دەرەكتەردى قورعاۋ، بانك كارتالارىن زاڭسىز ماقساتتا پايدالانۋعا جول بەرمەۋ جانە كۇماندى قارجىلىق وپەراتسيالاردان ساقتانۋ بويىنشا بىلىمدەرىن جەتىلدىردى.

جوبانىڭ تاعى ءبىر باعىتى – الەۋمەتتىك بەينەروليكتەر بايقاۋى. وعان قاتىسقان وقۋشىلار قارجىلىق الاياقتىقتىڭ جولدارىن، ونىڭ زارداپتارىن جانە ساقتانۋ تاسىلدەرىن وزدەرى زەرتتەپ، ستسەناري ازىرلەپ، شىعارماشىلىق جۇمىستار ۇسىندى. 

بايقاۋدىڭ «العاشقى كارتا» ساناتىندا اليموۆ نۇرالى ءى ورىن، نۇرالى كەنەسارى ءىى ورىن، بەركىنباي سايان ءىىى ورىندى يەلەندى. «قارجىلىق مونيتورينگ» ساناتىندا رۇستەمۇلى مۇحامەدقاناپيا ءى ورىن، تىلەۋبەك مۇحاممەديار ءىى ورىن، احمەتبەك اليحان ءىىى ورىنعا لايىق دەپ تانىلدى. «اقىلدى ساقشى» ساناتىندا ورداباي ايشا ءى ورىن، ورازالى پەريزات ءىى ورىن، ناقىپبەك ايسۇلتان ءىىى ورىندى يەلەنسە، «جەڭىل اقشا» ساناتى بويىنشا مىرزاحوجا شۇعىلا توپ جاردى. ال بالقىبەكوۆ بەكاسىل ءىى ورىندى ەنشىلەسە، بالتاباي جانيا ءىىى ورىن جۇلدەگەرى اتاندى.


سونىمەن قاتار جوبانى ۇيىمداستىرۋعا جانە وتكىزۋگە قوسقان ۇلەسى ءۇشىن ءبىلىم سالاسىنىڭ 5 وكىلى ماراپاتتالدى.

ءىس-شارا مازمۇندى قويىلىمدارمەن جانە كونتسەرتتىك باعدارلامامەن تولىقتى. وندا وبلىس پەن ەلىمىزدىڭ ونەرپازدارى ونەر كورسەتتى.

پىكىرلەر