جامبىل وبلىسىنىڭ قورداي اۋدانى تۇرعىنى ەكسترەميستىك جولداعى ازاماتقا تۇرمىسقا شىعىپ، 2015 جىلى كىشكەنتاي سابيىمەن بىرگە سيرياعا اتتانعان. ونىڭ تۋىستارى ءبىر جىل بويى كەلىنشەك تۋرالى ەش حابار الا الماي وتىر.
وتباسىن قۇرعان سوڭ بويجەتكەن بىردەن وزگەرە باستاپتى. ول تۋىستارىمەن مۇلدە سويلەسپەي، اتا-اناسىمەن دە سيرەك اڭگىمەلەسەتىن بولعان ەكەن.
روزا (ەسىمى وزگەرتىلگەن) تۇرمىسى جاقسى وتباسىندا تاربيەلەنگەن. ول "دەفەكتولوگ-لوگوپەد" ماماندىعى بويىنشا جوعارى ءبىلىم الىپ، ەكى جىل كولەمىندە قاسكەلەڭدە جۇمىس ىستەگەن. ال ۋنيۆەرسيتەتتە وقىپ جۇرگەندە الماتى قالاسىنداعى اپكەسىنىڭ ۇيىندە تۇرىپ ءجۇرىپتى.
تۇرمىسقا ارۋ 2014 جىلى 23 جاسىندا شىققان ەكەن. ال ونىڭ تارازدىق كۇيەۋى عاني (ەسىمى وزگەرتىلگەن) وزىنەن ءبىر جاس قانا ۇلكەن بولعان.
روزانىڭ جاقىندارى جىگىتتى مۇلدە تانىماپتى. ولار عانيدى تەك ءبىر-ەكى رەت قانا كورگەن ەكەن.
ولاردىڭ سوزىنشە، عاني كامەلەتتىك جاسقا تولماعان كەزدە ادام ءولتىردى دەپ ايىپتالىپ، التى جىلعا سوتتالعان ەكەن. الايدا، بۇل مالىمەتتەردى تۋىستارى كوپ ۋاقىتتان سوڭ عانا ەستىپتى.
جاس وتباسى تويدان كەيىن الماتىدا تۇرۋدى جوسپارلاعان. سونداي-اق، ولار وسى ۋاقىتتا سوعىس ىستەرى ءجۇرىپ جاتقان ايماققا كەتۋدى ماقسات تۇتقان كورىنەدى.
تۋىستارى قىزدارىمەن سوڭعى رەت 2015 جىلدىڭ 18 تامىز كۇنى سويلەسىپتى. اناسى تەلەفونمەن ولاردىڭ جولدا كەتىپ بارا جاتقاندارىن ەستىگەن ەكەن. بۇل ۋاقىتتا ولار قىرعىزستانعا كەتىپ، ارتىنشا تۋركيا مەن سيرياعا اتتانىپتى. ودان كەيىن بايلانىس تەك الەۋمەتتىك جەلى ارقىلى بولعان. ال ۋاقىت وتە جەلىمەن دە بايلانىسۋ مۇمكىن بولماي قالىپتى.
"ول ءبىزدىڭ قىزىمىزدى الداپ الىپ شىقتى. ول ۇنەمى وتىرىك ايتاتىن", - دەدى قىزدىڭ اناسى.
2018 جىلدىڭ ناۋرىز ايىندا جەلىدە روزانىڭ اتىنان عاني جازىپ، قىزدارىنىڭ تۇتقىندا ەكەنىن جەتكىزگەن. ونى بوساتۋ ءۇشىن 6 مىڭ دوللار (2,2 ميلليون) قاجەت ەكەنىن دە ايتىپتى.
ونىڭ ايتۋىنشا، سيرياداعى جارىلىستان كەيىن عانيدىڭ اناسى، روزا مەن قىزى تۋركياعا جىبەرىلىپتى. الايدا جولدا ولاردى كۇرتتەر تۇتقىنعا الىپ، قۇلدىققا سالىپ جاتقان كورىنەدى.
سىرتقى ىستەر مينيسترلىگىنەن قازاقستاندىق قىزدىڭ تۋىستارى وسى جىلدىڭ شىلدە ايىندا كومەك سۇراعان. قىزدىڭ قازىرگى مەكەن-جايى انىق بولماسا دا، مينيسترلىك بۇل شاعىمدى قابىلداپتى.
جانۇيا اناسى مەن قىزىن قازاقستانعا قايتا اكەلۋدىڭ جولدارى تابىلارىنا سەنىپ وتىر، دەپ حابارلايدى NUR.kz
