Jambyl oblysynyŋ Qordai audany tūrǧyny ekstremistık joldaǧy azamatqa tūrmysqa şyǧyp, 2015 jyly kışkentai säbiımen bırge Siriiaǧa attanǧan. Onyŋ tuystary bır jyl boiy kelınşek turaly eş habar ala almai otyr.
Otbasyn qūrǧan soŋ boijetken bırden özgere bastapty. Ol tuystarymen mülde söilespei, ata-anasymen de sirek äŋgımelesetın bolǧan eken.
Roza (esımı özgertılgen) tūrmysy jaqsy otbasynda tärbielengen. Ol "defektolog-logoped" mamandyǧy boiynşa joǧary bılım alyp, ekı jyl kölemınde Qaskeleŋde jūmys ıstegen. Al universitette oqyp jürgende Almaty qalasyndaǧy äpkesınıŋ üiınde tūryp jürıptı.
Tūrmysqa aru 2014 jyly 23 jasynda şyqqan eken. Al onyŋ Tarazdyq küieuı Ǧani (esımı özgertılgen) özınen bır jas qana ülken bolǧan.
Rozanyŋ jaqyndary jıgıttı mülde tanymapty. Olar Ǧanidy tek bır-ekı ret qana körgen eken.
Olardyŋ sözınşe, Ǧani kämelettık jasqa tolmaǧan kezde adam öltırdı dep aiyptalyp, alty jylǧa sottalǧan eken. Alaida, būl mälımetterdı tuystary köp uaqyttan soŋ ǧana estıptı.
Jas otbasy toidan keiın Almatyda tūrudy josparlaǧan. Sondai-aq, olar osy uaqytta soǧys ısterı jürıp jatqan aimaqqa ketudı maqsat tūtqan körınedı.
Tuystary qyzdarymen soŋǧy ret 2015 jyldyŋ 18 tamyz künı söilesıptı. Anasy telefonmen olardyŋ jolda ketıp bara jatqandaryn estıgen eken. Būl uaqytta olar Qyrǧyzstanǧa ketıp, artynşa Turkiia men Siriiaǧa attanypty. Odan keiın bailanys tek äleumettık jelı arqyly bolǧan. Al uaqyt öte jelımen de bailanysu mümkın bolmai qalypty.
"Ol bızdıŋ qyzymyzdy aldap alyp şyqty. Ol ünemı ötırık aitatyn", - dedı qyzdyŋ anasy.
2018 jyldyŋ nauryz aiynda jelıde Rozanyŋ atynan Ǧani jazyp, qyzdarynyŋ tūtqynda ekenın jetkızgen. Ony bosatu üşın 6 myŋ dollar (2,2 million) qajet ekenın de aitypty.
Onyŋ aituynşa, Siriiadaǧy jarylystan keiın Ǧanidyŋ anasy, Roza men qyzy Turkiiaǧa jıberılıptı. Alaida jolda olardy kürtter tūtqynǧa alyp, qūldyqqa salyp jatqan körınedı.
Syrtqy ıster ministrlıgınen qazaqstandyq qyzdyŋ tuystary osy jyldyŋ şılde aiynda kömek sūraǧan. Qyzdyŋ qazırgı meken-jaiy anyq bolmasa da, ministrlık būl şaǧymdy qabyldapty.
Janūia anasy men qyzyn Qazaqstanǧa qaita äkeludıŋ joldary tabylaryna senıp otyr, dep habarlaidy NUR.kz
