تانىمال ساياساتتانۋشى، مەملەكەتتىك جانە قوعام قايراتكەرى ايدوس سارىم قر قوعامدىق دامۋ ءمينيسترىنىڭ شتاتتان تىس كەڭەسشىسى بولىپ تاعايىندالدى.
ايدوس سارىم 1975 جىلى 10 قىركۇيەكتە تۋعان. 1992 جىلى ءال-فارابي اتىنداعى قازاق ۇلتتىق ۋنيۆەرسيتەتىن «تاريح» ماماندىعى بويىنشا تامامداعان.
ول ءار جىلدارى قر مۇراعاتتار مەن قۇجاتتامالار باس باسقارماسىنىڭ باس ينسپەكتورى، كەڭەسشىسى، قازاقستان ستراتەگيالىق زەرتتەۋلەر ينستيتۋتىنىڭ عىلىمي قىزمەتكەرى، اتىراۋ وبلىسى ىشكى ساياسات دەپارتامەنتىنىڭ ديرەكتورى، قر پرەزيدەنتى اكىمشىلىگىنىڭ سەكتور مەڭگەرۋشىسى، «اق جول» پارتياسىنىڭ ءباسپاسوز-حاتشىسى، كەڭەسشىسى، «ناعىز اق جول» پارتياسى تەڭ توراعاسىنىڭ كەڭەسشىسى، «جاس الاش» گازەتى باس رەداكتورىنىڭ ورىنباسارى، قر ۇلتتىق كىتاپحاناسى ديرەكتورىنىڭ كەڭەسشىسى قىزمەتتەرىن اتقاردى، دەپ حابارلايدى Qamshy.kz اقپارات اگەنتتىگى.
ايدوس سارىم بۇل جونىندە ءوزى مىناداي پىكىر ءبىلدىردى: "وتكەندە قازاق كوشى تۋرالى ۇلكەن جيىن بولىپ ەدى. سول جيىندى وتكىزگەن كەزدە قازاق كوشىن جانداندىرۋ تۇرعىسىندا جول كارتاسىن دايىنداۋ، قابىلداۋ تۋرالى ورتاق شەشىم قابىلدانعان بولاتىن.
سونى جۇرگىزۋ ماقساتىندا، ەلىمىزدەگى مەملەكەتتىك ەمەس ۇيىمدار مەن مينيسترلىك اراسىنداعى قارىم-قاتىناستاردى دامىتۋ، قولدان كەلگەنشە دانەكەر بولۋعا كەلىسكەن ەدىك. بۇگىن سونىڭ شەشىمى شىقتى.
بۇگىننەن باستاپ قوعامدىق دامۋ ءمينيسترى دارحان كالەتاەۆتىڭ شتاتتان تىس كەڭەسشىسى دەگەن قوعامدىق جۇمىسقا كىرىسپەكشىمىن.
جاقسى وي-ۇسىنىستار بولسا جۇرتپەن كەزىگىپ، سولاردى مينيسترلىك قۇزىرىنا جەتكىزۋگە ءازىرمىن.
بۇل جۇمىس ەشبىر وسىعان دەيىنگى تىرلىك پەن مىندەتتەمەلەرگە قايشى بولمايدى دەپ سانايمىن. "جاڭا قازاقستان" ۇيىمىنداعى جۇمىسىم دا جالعاسا بەرەدى".
