الماتى وبلىسى جامبىل اۋدانىنداعى ساۋىقتىرۋ ورنىندا «بالامدى ۇرىپ-سوقتى» دەگەن انا ادىلدىك ىزدەپ شۋ شىعاردى. ايتۋىنشا، دەمالىس ورنىنداعى سانيتارلىق تالاپ ءوز الدىنا، ءتىپتى سونداعى تاربيەشىلەر جاسوسپىرىمگە سەس كورسەتىپ، وزگە بالالارعا ۇلىن ۇرعىزعان. سونىڭ سالدارىنان مۇحامەتالي بازارعاليدىڭ ميى شايقالىپتى. ول قازىر بالالار اۋرۋحاناسىندا ەمدەلىپ جاتىر، دەپ جازادى "ادىرنا" ۇلتتىق پورتالى كتك ارناسىنا سىلتەمە جاساپ.
داۋ شىققان مەكەمەگە جەتكەن اۋداننىڭ شەنەۋنىكتەرى مەن سانيتار ماماندارى تەكسەرىستى باستاماقشى. ءۇش بالانىڭ اناسى ساندۋعاش سۇلتان قازىر ادىلدىك ىزدەپ ءجۇر. وسىدان ءبىر اپتا بۇرىن ۇلىنا لاگەرگە جولداما بەرىلگەندە ءدال بۇلاي اۋرۋحانادان ءبىر-اق شىعامىز دەپ ويلامادىم دەيدى. 14-تامىز كۇنى جامبىل اۋدانىنداعى «تاۋلەند» دەمالىس ورنىنا كەتكەن ۇلى ءۇش كۇن وتپەستەن ۇيىنە اكەتۋىن ءوتىنىپ جىلاعان.
«17-ءسى كۇنى كەشكى ساعات بەس جارىمدا بالام تەلەفون سوقتى، بوتەن نومىردەن حابارلاستى. «اناشىم» دەپ مەنىمەن قوشتاستى. «بۇگىن مەنىڭ سوڭعى ءومىرىم، وسىمەن ءبارى ءبىتتى»، - دەدى. ەندى بالا اناعا حابارلاسقان كەزدە «نەنى» دەپ ەدىم. «اناشىم، بۇگىن مەنى الىپ كەتىڭىزشى» - دەپ ءوتىندى. بالامدى كورگەن كەزدەگى جاعدايدى سوزبەن ايتىپ جەتكىزە المايمىن. بالانىڭ جاعدايى وتە ناشار بولدى. بالا ءالسىز. كۇشى جوق. كوزى دەگەن جاسقا تولى»، - دەيدى م.بازارعاليدىڭ اناسى ساندۋعاش سۇلتان.
وسىلايشا كەلىنشەك ۇلىن دەمالىس ورنىنان كەشقۇرىم ارەڭ الىپ شىققان. سودان كەيىن عانا مۇحامەتقالي اناسىنا ىشتەگى جاعدايدى بۇگە-شۇگەسىنە دەيىن بايانداعان.
«بالاعا تاماق بەرمەگەن. بىرەۋدىڭ قالدىق تاماعىن ىشكىزگەن. ءىشى لاس، كىر. ەشقانداي جاعداي جوق دەدى. شاعىمداناتىن بولساق، ءبىزدى ۇردى دەدى. جەتەكشىلەرى وزدەرى ۇرماي، بالالارعا ءبىزدى ۇرعىزدى دەدى. بالالار مەنى سول سەبەپتەن ۇردى»، - دەيدى اناسى.
ارتىنشا لاگەر مەن اكىمدىك قىزمەتكەرلەرى بالا مەن انانى سول اۋدانداعى اۋرۋحاناعا اپارعان. الايدا مۇحامەتاليدى تەكسەرىپ، «تۇك تاپپادىق» دەگەن اق حالاتتىلار ولاردى كەرى قايتارىپتى. بىراق ساندۋعاش تۇندەلەتىپ بولسىن، ءوزى تۇراتىن اۋدانداعى ايماقتىق بالالار اۋرۋحاناسىنا جەتكىزگەن. مۇنداعى دارىگەرلەر مۇحامەتاليدىڭ سوققى الىپ، تاياق جەگەنىن راستاپ وتىر.
«بىزگە بالا 18 تامىزدا تۇسكەن. بازارعالي مۇحامەتالي. 12 جاستاعى بالا. تۇسكەندەگى جالپى جاعدايى ورتاشا. باس جاراقاتىن العان. ميى شايقالعان. دەنەسىندە سوعىلعان جاراقاتتار بار. ءبىز ول بالانى دياگنوستيكا جاساپ، قازىر بالا ەمدەلىپ جاتىر. بۇگىندە بالانىڭ جالپى جاعدايى قالىپتى»، - دەدى الماتى ايماعى بالالار اۋرۋحاناسىنىڭ نەيروحيرۋرگى ەسەنتاي جاڭاباەۆ.
جامبىل اۋدانىنداعى «تاۋلەند» ساۋىقتىرۋ ورتالىعى. ەسىگىن جان بالاسىنا اشپاۋدى تاپسىرعان قوجايىنى سول كۇيى بوي كورسەتپەدى. ال جاعدايدى «الەۋمەتتىك جەلىدەن كورىپ كەلدىم» دەگەن حالىق قالاۋلىسىنىڭ ءوزى ىشكە كىرە المادى. ەندى بۇل جاعدايدى ۇكىمەتتە قوزعايمىن دەپ وتىر.
«ءوزىم دە، مىنە، كەلىپ تۇرمىن. ينتەرنەتتەن ەستىپ. دەپۋتاتتىق ساۋال جازامىن. بۇكىل جۇيەلى سۇراق. سەبەبى، تەك قارعالىداعى بالالار لاگەرى ەمەس، بۇكىل قازاقستانداعى لاگەرلەرگە ءبىزدىڭ مەملەكەتتىك تاپسىرىس بار بولاتىن. بالالارىمىز باراتىن جەرگە بايلانىستى بولىپ تۇر. سونى كوتەرۋىمىز كەرەك»، - دەدى ءماجىلىس دەپۋتاتى ءاليا ابسەمەتوۆا.
سانيتارلىق تالاپقا جاۋاپ بەرەتىن ماماندار ساندۋعاشتىڭ ارىزىن ءالى قابىلداماپتى. سول سەبەپتى ولاردىڭ دا وسىندا كەلىپ، ىشكە تەكسەرىس جۇرگىزۋگە قۇقىعى جوق. ول ءۇشىن جولداما قۇجاتى قولىنا ءتيىپ، پروكۋراتۋرادان رۇقسات الۋ كەرەك ەكەن. ال سىرتتا سابىلىپ كۇتكەن اكىم ورىنباسارىنىڭ ءوزى موراتوري جاريالانعالى، قولىمىزدان كەلەر شارا جوق دەدى. قازىر ساندۋعاش سۇلتان وبلىستىق پوليتسيا مەن سانيتارلىق باقىلاۋ دەپارتامەنتىنە ارىز جازىپ وتكىزدى. "بالامدى قورلاتىپ قويمايمىن" دەگەن كەلىنشەك ءىستى اياعىنا دەيىن اپارامىن دەپ وتىر.
"ادىرنا" ۇلتتىق پورتالى
