يراندا قۇرعاقشىلىق كۇشەيىپ، سۋ تاپشىلىعى ۋشىعىپ كەلەدى، تەگەران كورشى ەلدەردەن سۋ ساتىپ الۋعا دايىن، دەپ حابارلايدى "ادىرنا" ۇلتتىق پورتالى.
ەلدەگى 19 سۋ قويماسىنىڭ ون پايىزى تولىق كەۋىپ قالۋ قاۋپىندە تۇر.
يران ەنەرگەتيكا ءمينيسترى ابباس ءالياباديدىڭ مالىمدەۋىنشە، تەگەران سۋ قورىن قالىپتاستىرۋ جانە تاپشىلىقتى ەڭسەرۋ ماقساتىندا كورشى مەملەكەتتەرمەن كەلىسسوزدەر جۇرگىزىپ جاتىر.
ء«بىزدىڭ باستى مىندەتتەردىڭ ءبىرى – ەلدە ارتىق سۋ قورىن جيناقتاۋ مۇمكىندىگىن قاراستىرۋ. وسى باعىتتا كورشى ەلدەرمەن كەلىسسوزدەر جۇرگىزىلۋدە. الايدا گەوگرافيالىق ەرەكشەلىكتەرگە بايلانىستى وڭىردەگى كوپتەگەن مەملەكەتتەر دە وسىنداي قيىندىقتارعا تاپ بولىپ وتىر. سوندىقتان ءبىز يرانعا سۋ ەكسپورتتاۋعا دايىن كەز كەلگەن ەلدىڭ مۇمكىندىكتەرىن پايدالانۋعا ۇمتىلىپ وتىرمىز»، – دەدى مينيستر.
بۇعان دەيىن ISNA اگەنتتىگى ەلدەگى نەگىزگى سۋ قويمالارىنداعى سۋ دەڭگەيى نەبارى 32 پايىزدى قۇرايتىنىن حابارلاعان. ال Fars اگەنتتىگىنىڭ 8 قاراشاداعى ەسەبىنە سايكەس، 19 سۋ قويماسىنداعى سۋ قورى 5 پايىزدان تومەن دەڭگەيگە ءتۇسىپ كەتكەن.
يران مەتەورولوگيالىق قىزمەتى قازىرگى كۇز ماۋسىمىن سوڭعى 50 جىلداعى «ەڭ قۇرعاق كەزەڭ» دەپ باعالادى. رەسمي مالىمەت بويىنشا، جاۋىن-شاشىن مولشەرى كوپجىلدىق ورتاشا كورسەتكىشپەن سالىستىرعاندا 89 پايىزعا ازايعان.
ساراپشىلار تاياۋ شىعىستا سۋ رەسۋرستارىنىڭ ازايۋى كليماتتىڭ وزگەرۋىمەن تىعىز بايلانىستى ەكەنىن اتاپ وتۋدە.
