يران مەن يزرايلدەگى قاقتىعىستارعا بايلانىستى قازا تاپقاندار مەن زارداپ شەككەندەر اراسىندا قازاقستاندىقتار جوق. بۇل تۋرالى قازاقستان رەسپۋبليكاسى سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى، دەپ حابارلايدى "ادىرنا".
«قازا تاپقاندار مەن زارداپ شەككەندەردىڭ اراسىندا قازاقستان ازاماتتارى جوق. (…) بىزدەگى مالىمەتتەرگە سايكەس، قازىرگى ۋاقىتتا يراندا 132, ال يزرايلدە 219 قازاقستان ازاماتى بار. ازاماتتارىمىزدان اسا قاجەتتىلىكسىز تۇرعىلىقتى جەرىنەن شىقپاۋعا جانە قاۋىپسىزدىك شارالارىن كۇشەيتۋگە شاقىرامىز»، – دەدى سمادياروۆ دۇيسەنبى كۇنى وتكەن ءسىم بريفينگىندە.
سونداي-اق ول سوڭعى كۇندەرى سىرتقى ىستەر مينيسترلىگى يراننان قازاقستان ازاماتتارىن ەلگە قايتارۋعا كومەكتەسكەنىن اتاپ ءوتتى. اتاپ ايتقاندا، 74 ازامات يراننان ازەربايجان مەن تۇرىكمەنستان ارقىلى شىعارىلعان.
«قازىرگى ۋاقىتتا ازاماتتار مەن ديپلوماتتاردى ەۆاكۋاتسيالاۋ جوسپاردا جوق»، – دەپ قوستى مينيسترلىك وكىلى.
