ەرلىك يەلەرىمەن كەزدەسۋ

2065
Adyrna.kz Telegram

الماتى قالاسىنداعى جازۋشىلار كىتاپحاناسىندا كونستيتۋتسيا كۇنى قارساڭىندا «ادىرنا» بىرلەستىگىنىڭ الماتى قالاسى ىشكى ىستەر باسقارماسى قولداۋىمەن «ازاماتتىڭ بورىش» جوباسى اياسىندا ەستە قالارلىق كەزدەسۋ ءوتتى.  اۋعان سوعىسى ارداگەرلەرى كىتاپحانا وقىرماندارىنا قوناققا كەلىپ ءوز ومىرىندە كورگەن-تۇيگەنىمەن ءبولىستى. ءومىر جولىن ەندى باستاپ كەلە جاتقان جاس ۇرپاققا بۇنداي اڭگىمە بولىسۋلەر وتە كەرەك. وسى جوبانى ىسكە اسىرۋشى بىرلەستىك باسشىسى ارمان اۋباكىر، جوبانىڭ جەتەكشىسى دوس سىماعۇل، بىرلەستىك باسشىسىنىڭ ورىنباسارى بەيبىت نالىباەۆ جانە باسقالاردىڭ جۇمىسى ەش كەتكەن جوق.

كوپشىلىكتىڭ الدىنا شىققان كوشەرباەۆ سەرىك، باشيحتەنوۆ نۇرلان جانە باقىتجان مۋلينوۆ وزدەرىنىڭ باستارىنان كەشكەنىن ايتىپ، ەلىمىزدەگى قازىرگى جانە الەمدەگى جاعداي تۋراسىندا دا پىكىرلەرىن ءبىلدىردى.

پولكوۆنيك ن.باحيشتەنوۆ قازاق حالقىنىڭ جاۋىنگەرلىك قابىلەتى تۋرالى ايتا كەلىپ اسىرەسە قىز-كەلىنشەكتەر ەرلىگىنە توقتالدى. قازاق قىزدارىنىڭ بايىرعى زاماننان ەركىن وسكەنىن ايتا كەلىپ، قازىرگى كەيبىر جاستاردىڭ تەرىس ءدىني اعىمدارعا ەرىپ بەت-اۋزىن تۇمشالاپ الاتىنىن سىنادى. ءدىننىڭ كيىمگە ەش قاتىسى جوق ەكەنىن العا تارتتى. جاستار ەڭ الدىمەن قازاق تاريحىن، سالتتارىن ءبىلىپ، وزدەرى تاڭداعان ماماندىقتىڭ ۇدەسىنەن شىعۋى كەرەك ەكەنىن ەسكەرتتى. بۇگىنگى تاڭدا دەدى ول، كەيبىر بەلگىسىز كۇشتەر جاستاردىڭ ءالى كوپ نارسەلەردى تۇسىنبەتىندىگىن پايدالانۋدا. ءبىزدىڭ حالقىمىز قىزدارىنىڭ بەتىن جاپپاعان. سوندىقتان دا ولاردىڭ اراسىنان كوپتەگەن باتىرلار شىققان. ال قارا كيىم كيىپ تەك كوزدەرى كورىنىپ تۇراتىن جامىلعى جامىلىپ العاندار قالايشا ەركىن بولا الادى دەدى قۇرمەتتى قوناق.

كوشەرباەۆ س. اۋعان سوعىسىندا تىكۇشاقتىڭ باسشىسى بولعان جالعىز قازاق ەكەنى جينالعان جۇرتشىلىقتى تاڭ  قالدىردى. ول ا.روزەنباۋمنىڭ وزىنە ارناپ «قارا قىزعالداق» دەگەن ءان شىعارۋ وقيعاسىن قىزعىلىقتى بايانداپ بەردى. اۋعان سوعىسى ارداگەرى باسقارعان تىكۇشاقتى سول كوپشىلىك كەزدە «قارا قىزعالداق» اتاعان ەكەن.

ب.مۋلينوۆ ءوز كەزەگىندە ءوزىنىڭ باسىنان وتكەن وقيعالارىمەن ءبولىستى. جۇك تيەلگەن ماشينالار لەگىن دۇشماندار توقتاتقاندا جالعىز ءوزى قارسى شىعىپ اۋعاندىقتاردى كەرى قايتارعانى، وقشانتايداعى وقتارى تاۋسىلىپ قالسا دا ساسپاي ماشيناسىنا ورالىپ جاڭا وقشانتايلار العانى. سودان سوڭ جاۋلارعا قارسى قايتا ءبىر ءوزى شىققانى. ونىڭ وسى ەرلىگىنە ورىس جانە باسقا ۇلت وكىلدەرى تاڭ قالعانىن. قازاقتاردىڭ بۇنداي باتىر ەكەنىن بۇرىن بىلمەيتىن ەدىك دەپ ايتقانىن اڭگىمەلەدى.

ءتورتىنشى قوناق جەلتوقسان قوزعالىسىنا قاتىسقان امانعازى كارىپجانۇلى 1986 جىلعى وقيعالاردى ەسكە ءتۇسىردى. سول قاندى كەزەڭگە ارنالعان ءاندى ورىنداپ بەردى.

جاستار دا ءوز كەزەگىندە اعالارعا دەگەن قۇرمەتىن ءان جانە بيلەرىمەن ءبىلدىردى. اسىرەسە اتاقتى ءانشى ەركىن شۇكىماننىڭ شاكىرتى قۇرمانعازى اتىنداعى كونسەرۆاتوريانىڭ ستۋدەنتى ءبىرجان ءانشىنىڭ ورىنداۋىنداعى قازاقتىڭ اندەرى جيانلعان كوپشىلىكتىڭ كوڭىلدەرىن الاتاۋداي بيىككە كوتەردى. اۋعان سوعىسى ارداگەرلەرى جاستاردىڭ كوپتەگەن سۇراقتارىنا جاۋاپ بەردى.

ءوز كەزەگىندە «ادىرنا» ۇلتتىق بىرلەستىگىنىڭ باسشىسى ارمان اۋباكىر اعالاردىڭ ەرلىككە تولا ءومىر جولىنا، قازىرگى كەزدەگى ساياسي ۋشىعىپ تۇرعان ماسەلەلەر  تۋرالى ءوز ويىن ءبىلدىردى. كىتاپحانا باسشىسى جيىندى قورىتىندىلاپ قوناقتارعا العىسىن ءبىلدىردى.

پىكىرلەر