Almaty qalasyndaǵy Jazýshylar kitaphanasynda Konstıtýııa kúni qarsańynda «Adyrna» birlestiginiń Almaty qalasy Ishki ister basqarmasy qoldaýymen «Azamattyń borysh» jobasy aıasynda este qalarlyq kezdesý ótti. Aýǵan soǵysy ardagerleri kitaphana oqyrmandaryna qonaqqa kelip óz ómirinde kórgen-túıgenimen bólisti. Ómir jolyn endi bastap kele jatqan jas urpaqqa bundaı áńgime bólisýler óte kerek. Osy jobany iske asyrýshy birlestik basshysy Arman Áýbákir, jobanyń jetekshisi Dos Symaǵul, birlestik basshysynyń orynbasary Beıbit Nálibaev jáne basqalardyń jumysy esh ketken joq.
Kópshiliktiń aldyna shyqqan Kósherbaev Serik, Bashıhtenov Nurlan jáne Baqytjan Mýlınov ózderiniń bastarynan keshkenin aıtyp, elimizdegi qazirgi jáne álemdegi jaǵdaı týrasynda da pikirlerin bildirdi.
Polkovnık N.Bahıshtenov qazaq halqynyń jaýyngerlik qabyleti týraly aıta kelip ásirese qyz-kelinshekter erligine toqtaldy. Qazaq qyzdarynyń baıyrǵy zamannan erkin óskenin aıta kelip, qazirgi keıbir jastardyń teris dinı aǵymdarǵa erip bet-aýzyn tumshalap alatynyn synady. Dinniń kıimge esh qatysy joq ekenin alǵa tartty. Jastar eń aldymen qazaq tarıhyn, salttaryn bilip, ózderi tańdaǵan mamandyqtyń údesinen shyǵýy kerek ekenin eskertti. Búgingi tańda dedi ol, keıbir belgisiz kúshter jastardyń áli kóp nárselerdi túsinbetindigin paıdalanýda. Bizdiń halqymyz qyzdarynyń betin jappaǵan. Sondyqtan da olardyń arasynan kóptegen batyrlar shyqqan. Al qara kıim kııip tek kózderi kórinip turatyn jamylǵy jamylyp alǵandar qalaısha erkin bola alady dedi qurmetti qonaq.
Kósherbaev S. Aýǵan soǵysynda tikushaqtyń basshysy bolǵan jalǵyz qazaq ekeni jınalǵan jurtshylyqty tań qaldyrdy. Ol A.Rozenbaýmnyń ózine arnap «Qara qyzǵaldaq» degen án shyǵarý oqıǵasyn qyzǵylyqty baıandap berdi. Aýǵan soǵysy ardageri basqarǵan tikushaqty sol kópshilik kezde «Qara qyzǵaldaq» ataǵan eken.
B.Mýlınov óz kezeginde óziniń basynan ótken oqıǵalarymen bólisti. Júk tıelgen mashınalar legin dushmandar toqtatqanda jalǵyz ózi qarsy shyǵyp aýǵandyqtardy keri qaıtarǵany, oqshantaıdaǵy oqtary taýsylyp qalsa da saspaı mashınasyna oralyp jańa oqshantaılar alǵany. Sodan soń jaýlarǵa qarsy qaıta bir ózi shyqqany. Onyń osy erligine orys jáne basqa ult ókilderi tań qalǵanyn. Qazaqtardyń bundaı batyr ekenin buryn bilmeıtin edik dep aıtqanyn áńgimeledi.
Tórtinshi qonaq Jeltoqsan qozǵalysyna qatysqan Amanǵazy Káripjanuly 1986 jylǵy oqıǵalardy eske túsirdi. Sol qandy kezeńge arnalǵan ándi oryndap berdi.
Jastar da óz kezeginde aǵalarǵa degen qurmetin án jáne bılerimen bildirdi. Ásirese ataqty ánshi Erkin Shúkimannyń shákirti Qurmanǵazy atyndaǵy konservatorııanyń stýdenti Birjan ánshiniń oryndaýyndaǵy qazaqtyń ánderi jıanlǵan kópshiliktiń kóńilderin Alataýdaı bıikke kóterdi. Aýǵan soǵysy ardagerleri jastardyń kóptegen suraqtaryna jaýap berdi.
Óz kezeginde «Adyrna» ulttyq birlestiginiń basshysy Arman Áýbákir aǵalardyń erlikke tola ómir jolyna, qazirgi kezdegi saıası ýshyǵyp turǵan máseleler týraly óz oıyn bildirdi. Kitaphana basshysy jıyndy qorytyndylap qonaqtarǵa alǵysyn bildirdi.
