بۇگىن ۇكىمەت ۇيىندە وتكەن كەڭەس بارىسىندا ءاليحان سمايىلوۆ «جايلى مەكتەپ» ۇلتتىق جوباسىن ىسكە اسىرۋ جونىندە تاپسىرما بەردى. بۇل تۋرالى قر پرەمەر-ءمينيسترىنىڭ باسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
پرەمەر-مينيستر مەملەكەت باسشىسى رەفورمالار جونىندەگى جوعارى كەڭەستىڭ وتىرىسىندا «جايلى مەكتەپ» ۇلتتىق جوباسىنىڭ نەگىزگى تاسىلدەرىن ماقۇلداعانىن، ونىڭ شەڭبەرىندە 800 مىڭ وقۋشىعا ارنالعان جاڭا فورماتتاعى مەكتەپتەر سالۋ جوسپارلانعانىن ەسكە سالدى.
«ۇلتتىق جوبانى ىسكە اسىرۋعا جەدەل كىرىسۋىمىز كەرەك. الايدا بۇگىندە وڭىرلەردەگى 143 مەكتەپتىڭ جەر ۋچاسكەلەرىن انىقتاۋ بويىنشا سۇراقتار شەشىلمەگەن. بۇل جۇمىستى بارىنشا تەزدەتۋ قاجەت: قازان ايىنىڭ سوڭىنا دەيىن قۇرىلىسى 2023 جىلى جانە جىل سوڭىنا دەيىن 2024 جىلعا جوسپارلانعان مەكتەپتەر بويىنشا ماسەلەنى شەشۋ كەرەك»، — دەدى ءاليحان سمايىلوۆ.
سونداي-اق ول وقۋ پروتسەسىن تسيفرلاندىرۋدى تەزدەتۋ قاجەتتىگىن اتاپ ءوتتى.
«وسىعان بايلانىستى وقۋلىقتاردى تسيفرلىق فورماتقا كوشىرۋدى جەدەلدەتۋ جانە بالالاردى اۋىر سومكەلەردەن ارىلتۋ قاجەت. سونداي-اق اكىمدىكتەرمەن بىرلەسىپ، وقۋشىلاردى پلانشەتتەرمەن قامتاماسىز ەتۋ ماسەلەسىن شەشۋدى قولعا الۋ كەرەك. اتاپ ايتقاندا، “قازاقستان حالقىنا” قورىمەن بىرلەسىپ، ولاردى اۋىلدىق مەكتەپتەردىڭ بالالارى ءۇشىن ساتىپ الۋ مۇمكىندىگىن پىسىقتاۋ كەرەك»، — دەپ اتاپ ءوتتى ءاليحان سمايىلوۆ.
كەڭەس سوڭىندا ول تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە بايلانىس وپەراتورلارىمەن بىرلەسىپ، ەلىمىزدىڭ بارلىق مەكتەپتەرىن ساپالى جىلدامدىعى جوعارى ينتەرنەتپەن قامتاماسىز ەتۋدى تاپسىردى.
"ادىرنا" ۇلتتىق پورتالى
