باقىت سۇلتانوۆ ەۋرازيالىق ەكونوميكالىق كوميسسيانىڭ باسەكەلەستىك جانە مونوپولياعا قارسى رەتتەۋ جونىندەگى القاسىنىڭ مۇشەسى بولىپ تاعايىندالدى، دەپ حابارلايدى «ادىرنا» ءتىلشىسى.
ونىڭ قۇزىرەتىنە ەۋرازيالىق ەكونوميكالىق وداقتىڭ ترانسشەكارالىق نارىقتارىنداعى مونوپولياعا قارسى رەتتەۋ جانە باسەكەلەستىك ماسەلەلەرى ەنەدى.
باقىت تۇرلىحانۇلى 1971 جىلى 29 قاراشادا الماتىدا دۇنيەگە كەلگەن. 1994 جىلى قازاق ۇلتتىق تەحنيكالىق ۋنيۆەرسيتەتىن ينجەنەر-ەلەكتريك ماماندىعى بويىنشا، ال 1995 جىلى قازاق مەملەكەتتىك باسقارۋ اكادەمياسىن ەكونوميست ماماندىعى بويىنشا ءتامامدادى. ەڭبەك جولىن 1994 جىلى قارجى مينيسترلىگىندە قارجى نارىعىنىڭ قۇندى قاعازدارى باسقارماسى اكتسيونەرلەۋ جانە ليتسەنزيالاۋ ءبولىمىنىڭ جەتەكشى ەكونوميسى بولىپ باستادى. اعىمداعى جىلدىڭ تامىز ايىندا شەنەۋنىك پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى لاۋازىمىنان بوساتىلعان ەدى.
