ەۋروپانىڭ 11 ەلىنىڭ پرەزيدەنتتەرى رەسەيدەن ۋكرايناداعى ازاماتتىق نىساندارعا شابۋىل جاساۋدى دەرەۋ توقتاتۋدى تالاپ ەتتى. بۇل تۋرالى پولشا پرەزيدەنتىنىڭ رەسمي سايتى مالىمدەدى، دەپ حابارلايدى “ادىرنا” ۇلتتىق پورتالى.
بولگاريا، چەحيا، ەستونيا، ۆەنگريا، لاتۆيا، ليتۆا، پولشا، رۋمىنيا جانە سلوۆاكيا، سونداي-اق سولتۇستىك ماكەدونيا مەن چەرنوگوريا كىرەتىن "بۋحارەست توعىزدىعى" ەلدەرى رەسەيدىڭ ۋكرايناعا جاساعان جاپپاي زىمىراندىق شابۋىلدارىن ايىپتادى. بىرلەسكەن مالىمدەمەدە ولار ماسكەۋدەن ازاماتتىق نىساندارعا شابۋىل جاساۋدى دەرەۋ توقتاتۋدى تالاپ ەتتى.
ء"بىز ءوز مەملەكەتتەرىمىزدىڭ اتىنان رەسەيدەن ازاماتتىق نىساندارعا شابۋىل جاساۋىن دەرەۋ توقتاتۋدى تالاپ ەتەمىز. ءبىز جاسالىپ جاتقان قىلمىستارعا كىنالىلەردى جاۋاپقا تارتۋ ارەكەتىن توقتاتپايمىز", - دەلىنگەن قۇجاتتا.
ودان بولەك، حالىقارالىق قۇقىق مۇنداي شابۋىلداردى اسكەري قىلمىس دەپ سانايتىنىن ءتۇسىندىردى.
"سوعىس قىلمىستارى مەن ادامزاتقا قارسى قىلمىستاردىڭ ەسكىرۋ مەرزىمى جوق جانە ول بۇكىل الەم بويىنشا سوتتاردىڭ يۋريسديكتسياسىنا جاتاتىنىن ەسكە سالامىز", - دەلىنگەن حابارلامادا.
مەملەكەت باسشىلارى رەسەي وكىلدەرىنىڭ يادرولىق قارۋدى قولدانۋ قاۋپىن قابىلداۋعا بولمايتىنىن اتاپ ءوتتى.
"وسى تۇرعىدا ءبىز ءوز ەلدەرىمىز بەن وداقتاستارىمىزدى قورعاۋعا دەگەن ادالدىعىمىزدى راستايمىز", - دەلىنگەن قۇجاتتا.
