بۇل كۇندەرى الەمدە جالپىجاھاندىق جويقىن جاڭعىرۋلار بولىپ جاتقانى جاسىرىن ەمەس. شىنتۋايتىندا، ءۇشىنشى دۇنيەجۇزىلىك سوعىس ءجۇرىپ جاتىر دەسە دە بولادى. ۋكراينا اسپانىن ىدىراۋ مەن ىمىراسىز قۇلدىقتىڭ قارا بۇلتى تورلاپ تۇر. ءجۇز مىڭداعان بوسقىندار ۇمىتسىزدىكتەن رەسەيدى تاستاي قاشىپ، شارتاراپقا شاشىراپ، ۇدەرە كوشۋدە. الەمدىك ءتارتىپ پەن حالىقارالىق تەڭگەرىم تۇبەگەيلى وزگەرىسكە ۇشىراۋدا. جەر-جاھان مۇزداي قۇرسانىپ، جاپپاي قارۋلانۋدان جارىس ءجۇرىپ جاتقان جايى بار. كۇنى كەشەگى ۇيرەنشىكتى ۇيلەسىمدەرىمىز بەن قالاۋلى قۇندىلىقتارىمىز قاتىگەز سىناقتاردىڭ قۇرساۋىندا قالدى. تەلەديدارلاردىڭ كوگىلدىر اينالارى مەن كومپيۋتەرلەردىڭ ءمولدىر مونيتورلارى كۇننەن كۇنگە تۇنەرە ءتۇسىپ، ورتكە ورانعان ۇشاقتار مەن تانك قاڭقالارىن، تاس-تالقانى شىققان ءۇي-جايلار مەن عيماراتتاردىڭ ۇيىندىلەرىن، اجال قۇشقان ۋكراين جانە رەسەي جاۋىنگەرلەرىن كورسەتۋدە. البەتتە، بۇل بۇگىنگى الەمنىڭ ەشبىر اسىرەلەۋسىز بەت-بەينەسى.
تاپ قازىر قازاقستان دا اسا كۇردەلى تاڭداۋدىڭ الدىندا تۇر. تارازى باسىندا، بۇگىنگى ۋاقىت تالقىسىنىڭ ۋىسىندا ءبىزدىڭ بالالارىمىز بەن نەمەرەلەرىمىزدىڭ بولاشاعى بار. ەلىمىزدىڭ ەرتەڭىنىڭ دە الداعى پرەزيدەنت سايلاۋىندا كىمدى تاڭداۋىمىزبەن تىكەلەي بايلانىستى ەكەنى انىق. بيلىك باسىنا تاناۋىنان ارىدەگىگە تانىمى جەتپەيتىن مىڭ قۇبىلعان سۋماقايلار مەن الاياقتار، قىزىل ءسوزدى قىمىزداي ساپىرعان ءسوزۋارلار مەن جەلبۋاز ءدىلمارلار كەلسە، بار حالقىمىز ءۇشىن ستراتەگيالىق ۇلكەن ۇتىلىسقا ۇرىنۋ، بارشا قازاق پەن بۇكىل قازاقستاندىقتاردىڭ ءبىرجولا جەڭىلىس تابۋى بولماق.
بۇل جاعدايدى ءبىزدىڭ «ازامات – ازاماتتىق باستاما» قوعامدىق بىرلەستىگى جاقسى ءتۇسىنىپ، بولاشاقتى اقىلمەن باعامداپ وتىر.
سوندىقتان دا الداعى پرەزيدەنت سايلاۋىنىڭ قارساڭىندا ءبىز قاسىم – جومارت كەمەلۇلى توقاەۆقا قولداۋ بىلدىرەمىز. ونىڭ وراسان زور تاجىريبەسىن ءبىلىپ، تۇلعالىق تەرەڭدىگىن تانىعاندىقتان دا وسىنداي شەشىمگە توقتادىق.
قاسىم – جومارت كەمەلۇلى توقاەۆ – التى ءتىل مەڭگەرگەن مايتالمان، تاماشا ديپلومات. ول بۇرىن بىرىككەن ۇلتتار ۇيىمى باس حاتشىسىنىڭ ورىنباسارى لاۋازىمىندا بولعان بىرەگەي جادى مەن ەنتسيكلوپەديالىق ءبىلىمنىڭ يەسى عانا ەمەس، قاراپايىم حالىقتىڭ شىن جاناشىرى، ەل مۇددەسى ءۇشىن ەڭبەك ءسىڭىرىپ جۇرگەن ەرەن ساياساتكەر.
ول – بەيمازا شاقتا قازاقستان مەملەكەتتىگىنىڭ كەمەسىن تۋلاعان تەڭىزدەردىڭ بەيبەرەكەت تولقىندارىنان جايلى اعىستارعا الىپ شىعۋعا قارىمى مەن قاۋقارى جەتەتىن، جايماشۋاق جاعالاۋلارعا باستاۋعا قابىلەتتى قايراتكەر.
«ازامات – ازاماتتىق باستاما» قوعامدىق بىرلەستىگى ءوز ۇمىتكەرى قاسىم – جومارت كەمەلۇلى توقاەۆقا بارىنشا قولداۋ كورسەتىپ، ونىڭ ەلدەگى ساياسي رەفورمالاردى ىسكە اسىرىپ، جەمقورلىقپەن كۇرەس جۇرگىزۋىنە جانە كوپۆەكتورلى سىرتقى ساياسات باعىتىن ارى قاراي دامىتۋىنا كۇش قوسۋعا دايار.
ەكىنشى دۇنيەجۇزىلىك سوعىستان كەيىن بولىپ كورمەگەن، ەندى عانا تاريح ساحناسىنا شىعىپ تۇرعان قازىرگى الماعايىپتار كەزەڭىندە قازاقستان حالقى ءۇشىن سىرتقى ساياساتتا دۇرىس تاڭداۋ جاساپ، الىس ءھام جاقىن كورشىلەرىمىزبەن ستراتەگيالىق سەرىكتەستىك پەن ىنتىماقتاستىق بايلانىستاردىڭ التىن كوپىرلەرىن قالىپتاستىرۋعا ۇمتىلۋ اسا ماڭىزدى ەكەنى داۋ تۋدىرا قويماس. ءبىز سىرتقى ساياساتتاعى وسىناۋ ءدۇدامال دۇربەلەڭدەردەن مەيلىنشە از شىعىنمەن، مۇمكىندىگىنشە مول تابىسپەن شىعۋعا تىرىسىپ باعۋىمىز كەرەك. جاراتۋشى يەمىز القالاپ، الەمدىك ساياسي احۋالدىڭ ءوزى قازاقستاننىڭ پوستكەڭەستىك كەڭىستىكتە دارگەيلى داۋلەتكە اينالىپ، گۇلدەنگەن دە دامىعان مەملەكەت بولۋىنا سيرەك مۇمكىندىكتى ۇسىنىپ تۇرعانداي. ءبىز بولساق، قازاقستاننىڭ مەملەكەتتىگىن نىعايتىپ، ەلدى كۇشەيتە ءتۇسۋ قاسىم – جومارت كەمەلۇلى توقاەۆتىڭ قولىنان كەلەتىنىنە ەش كۇمان كەلتىرمەيمىز جانە سارابدال ساياساتتىڭ ساردارىنا ۇلكەن سەنىم ارتامىز.
«ازامات – ازاماتتىق باستاما» قوعامدىق بىرلەستىگىنىڭ اتىنان جانە اماناتتاۋى بويىنشا
بىرلەستىك توراعاسى سەرىك مالەەۆ
قازاقستان رەسپۋبليكاسىنىڭ حالىق ءارتىسى تۇڭعىشباي جامانقۇلوۆ
كينورەجيسسەر تالعات جانىبەكوۆ
كاسىپكەر ۆيكتور دولگالەۆ.
