قادىرلى باۋىرلار!
«قازاق حالقىنىڭ مۇراسى» كىتاپتار سەرياسىنىڭ ۇلت قۇندىلىقتارىن ساقتاۋ مەن ناسيحاتتاۋعا باعىتتالعان قازاق كۇنتىزبەسىندە 15 قازان – مەملەكەتتىك ءتىل كۇنى بولىپ بەلگىلەنگەن. بۇل كۇن قازاقتىڭ كورنەكتى ساياسي جانە قوعام قايراتكەرى ساكەن سەيفۋلليننىڭ تۋعان كۇنىنە ورايلاستىرىلدى. بارلىقتارىڭىزدى وسىناۋ ءمان-ماڭىزى تەرەڭ، تۋعان ءتىلىمىزدىڭ ابىرويىن اسقاقتاتۋعا باعىتتالعان ايتۋلى كۇنمەن شىن جۇرەكتەن قۇتتىقتايمىن!
بۇل كۇن ءبىزدى قازاقتىڭ الاش زيالىلارىنىڭ ەڭبەگىمەن قاۋىشتىرىپ، ولاردىڭ جولىن جالعاستىرعان ازاماتتارىمىزدىڭ ۇلتقا قىزمەتىن پاش ەتەدى جانە وسى ارقىلى جاس ۇرپاققا ۇلتتىق تاربيە بەرۋدى كوزدەيدى.
سانالى عۇمىرىن قازاقتىڭ ىرگەلەنۋىنە ارناعان س.سەيفۋللين ءوز داۋىرىندە قازاق ءتىلىنىڭ مەملەكەتتىك ءتىل مارتەبەسىن الۋىنا ۇلكەن ەڭبەك سىڭىرگەن تاريحي تۇلعا. ول حالىق كوميسسارلارى كەڭەسىنىڭ توراعاسى قىزمەتىندە ءجۇرىپ «كەڭسە ىستەرىن قازاق تىلىندە جۇرگىزۋ كەرەك» - دەپ ارنايى ماسەلە كوتەرىپ، وسىنىڭ ناتيجەسىندە 1923 جىلعى قاراشادا جارىق كورگەن دەكرەتپەن قازاق تىلىنە مەملەكەتتىك ءتىل دارەجەسى بەرىلدى. وسى قىزمەتتە ءجۇرىپ ول ا.بايتۇرسىنۇلىنىڭ 50-جىلدىعىن اتاپ ءوتۋدى، قازاق كينوسىن قارجىلاندىرۋ ءىسىن، قوجا احمەت ياساۋي كەسەنەسىن رەستاۆراتسيالاۋعا قارجى ءبولۋ، ا.زاتاەۆيچكە قازاق ءان-كۇيلەرىن جيناتۋ ءىسىن قولعا الدى. ال «قازاقتى قازاق دەيىك، قاتەنى تۇزەتەيىك» ماقالاسىندا «…مەملەكەت اتىن «قازاق رەسپۋبليكاسى» دەپ وزگەرتىپ، مەملەكەتتىك ءتىل قازاق ءتىلى بولۋ كەرەك» - دەپ بۇل ماسەلەگە نۇكتە قويدى. اراعا از ۋاقىت سالىپ بارىپ 1925 جىلى قىرعىز اسسر-ءى اتاۋى قازاق اسسر-ءى بولىپ وزگەرتىلدى.
ۇلىلارىمىز اتقارعان وسى ەڭبەكتەر ءبىزدىڭ ۇرپاققا دا جاۋاپكەرشىلىك ارتادى. ەندەشە ارۋاقىتتا دا ۇلت مۇددەسىن ەستەن شىعارمايىق. مەملەكەتتىك ءتىلىمىز جاساي بەرسىن!
قۇرمەتپەن،
مۇحتار شاحانوۆ،
قازاقستاننىڭ ەڭبەك ەرى
