تاجىكستاننىڭ «حاربمايدون» پوليگونىندا ورتالىق ازيا ءوڭىرىنىڭ جەدەل ورىستەتۋ ۇجىمدىق كۇشتەرىنىڭ (جاۇك) بولىمشەلەرىمەن «شەكارا-2022» بىرلەسكەن وقۋ-جاتتىعۋى باستالدى. بۇل تۋرالى قورعانىس مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
ء“بىرىنشى كەزەڭدە تاۋلى جەرلەردە زاڭسىز قارۋلى قۇرالىمداردى جويۋ بويىنشا جەدەل ارەكەت ەتۋ ۇجىمدىق كۇشتەرىنىڭ بىرلەسكەن وپەراتسياسىن دايىنداۋ جۇزەگە اسىرىلۋدا. ەكىنشى كەزەڭدە بولىمشەلەردى باسقارۋ، جاۋىنگەرلىك توپتاردى بۇعاتتاۋ جانە جويۋ ماسەلەلەرى پىسىقتالىپ، مەملەكەتتىك شەكاراداعى جاعدايدى قالپىنا كەلتىرۋ ماقساتىندا جاۋىنگەرلىك جانە ارنايى ءىس-قيمىلدار جۇرگىزىلەتىن بولادى”، – دەلىنگەن حابارلامادا.
سونداي-اق، قازاقستاننان «استانا» وڭىرلىك قولباسشىلىعى اسكەرلەرى قولباسشىسىنىڭ ءبىرىنشى ورىنباسارى – شتاب باستىعى پولكوۆنيك باعلان وسەرباەۆتىڭ باسشىلىعىمەن دەسانتتىق-شابۋىلداۋ اسكەرلەرىنىڭ بولىمشەسى جۇمىلدىرىلدى. جاتتىعۋدىڭ شەشۋشى كەزەڭى «حاربمايدون» پوليگونىندا 20-21 قازان ارالىعىندا وتەدى.
