قازاقستان پالەستيناعا 1 ملن اقش دوللار گۋمانيتارلىق كومەك اۋداردى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى “ادىرنا” ۇلتتىق پورتالى.
گازا سەكتورىنداعى اپاتتى گۋمانيتارلىق جاعدايدى ەسكەرە وتىرىپ، قازاقستان پالەستينا حالقىنا 1 ملن اقش دوللارى كولەمىندە گۋمانيتارلىق كومەك كورسەتۋگە شەشىم قابىلداعان ەدى.
بۇل شەشىمدى تۇركى مەملەكەتتەرى ۇيىمىنىڭ ونىنشى ءسامميتى بارىسىندا قازاقستان پرەزيدەنتى جاريالادى. قازاقستان ۇكىمەتى بولگەن قاراجات بۇۇ تاياۋ شىعىس اگەنتتىگىنە اۋدارىلدى. ۇيىم پالەستينا حالقىنا جەتى ونجىلدىق بويى توتەنشە جانە باسقا دا كومەك كورسەتەتىن جۇمىستاردى ۇيىمداستىرىپ كەلەدى. ايتا كەتەتىن جايت، گۋمانيتارلىق قىزمەت ەلىمىزدىڭ سىرتقى ساياساتىنىڭ ماڭىزدى باعىتىنىڭ ءبىرى. بەيبىت ساياسات پەن ادىلدىك قاعيداتتارىن ۇستاناتىن قازاقستان ءاردايىم قيىن گۋمانيتارلىق جاعدايعا تاپ بولعان مەملەكەتتەرگە قولداۋ كورسەتۋگە ۇمتىلادى، - دەدى ايبەك سمادياروۆ.
ەسكە سالا كەتەيىك، بۇعان دەيىن گازا سەكتورىندا قازاقستاننىڭ 76 ازاماتى بار ەكەنىن, ەل ازاماتتارى نەگە كەلە الماي وتىرعانىن جاريالاعان ەدىك.
