سولتۇستىك قازاقستان وبلىسىنا ورتالىق ازيا مەملەكەتتەرىنىڭ بىرىنەن زاڭسىز اكەلىنگەن بالالار انىقتالدى، دەپ حابارلايدى "ادىرنا" ۇلتتىق پورتالى قازاقپارات-قا سىلتەمە كورسەتە وتىرىپ.
سقو پوليتسيا دەپارتامەنتى مەن ۇلتتىق قاۋىپسىزدىك كوميتەتى 18 ءcاۋىر كۇنى قىزىلجار قالاسىندا جەدەل-ىزدەستىرۋ شارالارىن جۇرگىزىپ، 7 پاتەردى باستان-اياق تەكسەردى.
ناتيجەسىندە، ورتالىق ازيا مەملەكەتتەرىنىڭ بىرىنەن كەلگەن 5 جاستان 15 جاسقا دەيىنگى بالالار انىقتالدى. بالالاردىڭ قازاقستان اۋماعاندا ءجۇرىپ-تۇرۋىنا رۇقسات بەرەتىن قۇجاتتار بولمادى.
ءۇي-جاي بەرۋ جولىمەن زاڭسىز كوشى-قوندى ۇيىمداستىرۋ، سونداي-اق شەتەلدىكتەرگە قر اۋماعىنا زاڭسىز كىرۋ، شىعۋ، ەل اۋماعىندا ءجۇرىپ-تۇرۋ ءۇشىن وزگە دە قىزمەتتەر كورسەتۋ دەرەكتەرى تىركەلدى.
اتالعان ىسكە بايلانىستى جەدەل تەرگەۋ توبى قۇرىلدى. تەرگەۋ قك 394-بابى، 2-بولىگى بويىنشا جۇرگىزىلىپ جاتىر.
انىقتالعان تۇلعالاردان، ونىڭ ىشىندە كامەلەتكە تولماعانداردان جاۋاپ الىنىپ، سۇراۋ سالىنۋدا.
ماسەلەنىڭ ءمانىن تولىققاندى انىقتاۋعا قاجەتتى ساراپتامالار تاعايىندالدى.
"ادىرنا" ۇلتتىق پورتالى
ۇقساس جاڭالىقتار
