عالامتوردا ۇرىعىن جارنامالاپ، ساۋداعا سالاتىن ەركەكتەر كوبەيگەن، دەپ حابارلايدى ”ادىرنا” ۇلتتىق پورتالى استانا ارناسىنا سىلتەمە جاساپ.
مامانداردىڭ ايتۋىنشا، وعان باستى سەبەپ «ءوزى ءۇشىن بالا تۋىپ العىسى كەلەتىن قىزداردىڭ» كوبەيۋى ەكەن.
قازىر بالالى بولعىسى كەلەتىن كەز كەلگەن ايەل جاساندى جولمەن ءسابي كوتەرە الادى. بويى 180 سم-دەن جوعارى، كوزى دومالاق، شاشىنىڭ ءتۇسى قوڭىر. قۇلاعى قالقاڭقۇلاق بولماۋى كەرەك.
وسىلايشا، بولاشاق بالاڭنىڭ رۋىن دا، ءتۇرىن دە تاڭداۋعا بولادى. ۇرىق دونورىن ىزدەيتىن قىز-كەلىنشەكتەردىڭ الەۋمەتتىك جەلىدەگى جازباسى وسىنداي. ولار دونور بولامىن، ۇرىق تاپسىرامىن دەگەن ەركەكتىڭ كەسكىن-كەلبەتىنە، بويىنا – بارىنە ەرەكشە ءمان بەرىلەدى. «ءوزىم ءۇشىن» تۋىپ الامىن. بۇل سوزگە دە ەتىمىز ۇيرەندى. وڭ جاقتا وتىرىپ قالعان قىزدار ۋاقىتىن وتكىزىپ الماۋى ءۇشىن كەيدە «كوزسىز ەرلىككە» بارىپ، نەكەسىز بالا تابۋعا تاۋەكەل ەتەدى. سولاردىڭ ءبىرى، 22 جاستاعى – اياۋلىم.
سۇرانىس ارتقان سايىن، عالامتوردا ۇرىعىن جارنامالاپ، ساۋداعا سالاتىن ەر ازاماتتار كوبەيگەن. ولاردىڭ دەنى – وزگە ۇلت وكىلدەرى. ۇرىعىن جارنامالاعان جىگىتتەردىڭ سۇرايتىن اقىسى ءارتۇرلى. ەڭ ارزانى – 30 مىڭ تەڭگە.
الايدا رەپرودۋكتولوگ ماماندار الەۋمەتتىك جەلىدەن كورگەن مۇنداي حابارلاما يەلەرىنە جۇگىنبەۋگە كەڭەس بەرەدى. ويتكەنى عالامتورداعى «ساۋداگەرلەردىڭ» دەنى ارنايى تەكسەرىستەن وتپەيدى.
«ءبىر ۇرىق تاپسىرساڭ، ءبىر پورتسيا 30 مىڭ تەڭگە. ءبىر كەلىپ تاپسىرۋى. ەگەر بەس رەت كەلىپ تاپسىرسا، بەسكە كوبەيتەسىز، 10 رەت تاپسىرسا ونعا كوبەيتەمىز. بۇل جەردە ەڭ ماڭىزدىسى – ساپا. بىزگە كوبىسى كەلگەن كەزدە قارايتىن بولساق 80%-عا جۋىعى دونور بولا المايدى. ويتكەنى كورسەتكىشتەرى دونورلىققا سايكەس كەلمەيدى»، – دەيدى ۋرولوگ ارمان ەسەنۇلى.
قازاقستان اۋماعىندا ەكستراكورپورالدى ۇرىقتاندىرۋمەن اينالىساتىن 20-عا جۋىق كلينيكا بار. زاڭ بويىنشا 35 جاسقا دەيىنگى ەر ادام جاسىرىن تۇردە دونور بولا الادى.
«تالاپ بۇل – ارنايى مەديتسينالىق ۇيىمنىڭ قورىتىندىسى كەرەك. ول جەردە دەنساۋلىعى، پسيحيكالىق جانە رەپرودۋكتيۆتى دەنساۋلىعى ساي ەكەنىنىڭ قورىتىندىسى كەرەك»، – دەيدى زاڭگەر ولجاس لەكەروۆ.
ال ءدىن وكىلدەرىنىڭ ايتۋىنشا، ۇرىق دونورى بولۋ شاريعاتقا قايشى. ولار مۇنداي جولمەن دۇنيەگە كەلگەن بالا نەكەسىز تۋعان بوپ سانالادى، دەيدى.
«بوگدە ايەلدىڭ جۇمىرتقا كلەتكاسى نەمەسە وزگە ەر كىسىنىڭ شاۋەتى نەمەسە جۇمىرتقا كلەتكانى وزگە ايەلدىڭ جاتىرىنا قوندىرۋ ارقىلى ىسكە اسسا، وندا ول شاريعات بويىنشا حارام بولادى. بۇل جولداردىڭ كەز كەلگەنى زينانىڭ ءبىر تۇرىنە جاتادى»، – دەيدى قازاقستان مۇسىلماندارى ءدىني باسقارماسى.
ۇرىق دونورلىعى ەلىمىزدە 1990 جىلدارى باستالعان. ەرلەر مەن ايەلدەر ەكو-ورتالىقتارعا قانشا رەت ۇرىق ساتسا دا، شەكتەۋ جوق. ولاردىڭ كىم ەكەنىن زەرتتەپ-زەردەلەپ جاتقان ارنايى جۇيە دە قاراستىرىلماعان. ال كەلەشەكتە سول ۇرىق يەسىنەن تاراعان ۇرپاق ءبىر-بىرىمەن شاڭىراق كوتەرىپ، نەكە قيماۋىنا ەشكىم كەپىلدىك بەرە المايدى.
