پاۆلودارلىق فۋتبول قايتا جانداندى. بيىل قازاقستاننىڭ پرەمەر-ليگاسىندا العاشقى ماۋسىمىن وتكىزگەن «اقسۋ» فۋتبول كلۋبى جدانكۇيەرلەر ءۇمىتىن اقتاپ، التىنشى ورىنعا تۇراقتادى.
بىرەر جىل بۇرىن قازاقستان فۋتبولىنداعى اتى اڭىزعا اينالعان «ەرتىس» كومانداسى جىلدار بويى قوردالانعان قارىزى سالدارىنان بانكروتقا ۇشىراعان ەدى. بۇل شەشىم سول كەزدە پاۆلودار وبلىسى اكىمى قىزمەتىنە جاڭا تاعايىندالعان ابىلقايىر سقاقوۆقا وڭاي سوقپاعان ەدى. امال جوق، قارىزعا بەلشەسىنەن باتقان فۋتبول كلۋبىنىڭ جۇمىسىن توقتاتۋعا تۋرا كەلدى. جانكۇيەرلەر تاراپىنان ءبىراز سىن دا ايتىلعان ەدى.
«ەرتىستىڭ» ورىنىن «اقسۋ» فۋتبول كومانداسى باستى. ونىڭ دەنىن پاۆلودارلىق فۋتبول مەكتەبىنىڭ تۇلەكتەرى قۇرادى. جەرگىلىكتى اياق دوپ شەبەرلەرى ءۇمىتتى اقتادى. بىلتىر ءبىرىنشى ليگانىڭ چەمپيوندارى اتانىپ، پرەمەر-ليگاعا جولداما الدى. ال بيىل جوعارعى ليگاداعى العاشقى ماۋسىمىندا-اقكىل مىقتىلاردىڭ اراسىندا التىنشى ورىنعا تۇراقتادى.
جانكۇيەرلەردىڭ پاۆلودارلىق فۋتبولدىڭ بولاشاعىنا دەگەن سەنىمى قايتا وياندى. جۇرتشىلىق «اقسۋ» ساپىندا جەرگىلىكتى سپورتشىلاردىڭ دوپ تەۋىپ، تاجىريبە جيناپ جۇرگەنىنە قۋانادى.
ماۋسىم اياقتالا سالىسىمەن پاۆلودار وبلىسىنىڭ اكىمى ابىلقايىر سقاقوۆ فۋتبولشىلارعا جاقسى ناتيجە كورسەتكەنى ءۇشىن العىسىن ءبىلدىردى.
«مىنە، «اقسۋدىڭ» قازاقستاننىڭ پرەمەر-ليگاسىنداعى دەبيۋتىنىڭ كۋاسى بولدىق. بۇل ماۋسىم وڭايعا سوققان جوق. جارقىن، ءتىپتى، سەنساتسيالىق جەڭىستەر دە، جەڭىلىستەر دە بولدى. بارلىعىنان ساباق الدىق. بىراق، ەڭ باستىسى، فۋتبولشىلارىمىز ەشتەڭەگە قاراماستان العا ۇمتىلدى. ماقسات، جاستىق جالىن مەن تاجىريبە ۇشتاسقان پاۆلودارلىق فۋتبولدى پاش ەتۋ. ماقسات ورىندالدى. بۇل ءبىزدىڭ پرەمەر-ليگاداعى العاشقى قادامىمىز ەكەنىن ەسكەرسەك، التىنشى ورىن جاقسى ناتيجە دەپ ەسەپتەيمىن. ءاربىر ويىنشىنشىعا، باپكەرلىك قۇرامعا، كلۋب باسشىلىعىنا قاجىرلى ەڭبەك، جارقىن ساتتەر ءۇشىن العىسىمدى بىلدىرەمىن! كەلەسى ماۋسىمدا تابىس تىلەيمىن»، – دەدى وبلىس اكىمى.
