قر پرەزيدەنتتىگىنە ۇمىتكەر مەيرام قاجىكەن اقتاۋعا جۇمىس ساپارىمەن كەلدى. مۇندا ول تەڭىز ساۋدا پورتىنا باردى. پورت قىزمەتكەرلەرى پاروم كەشەنى، مۇناي قۇيۋ ايلاقتارى، استىق جانە قۇرعاق جۇك تەرمينالدارى، تيەۋ-ءتۇسىرۋ كەشەنى، پورتوفلوت، «باۋتينو» جۇك اۋدانى، ونىڭ ينفراقۇرىلىمى تۋرالى ايتىپ بەردى. بارلىق نىساندار تاۋلىك بويى جۇمىس ىستەيدى. ءبىر ۋاقىتتا پورتتا 9 كەمە وڭدەلۋى مۇمكىن. جۇكتەردى اۋىستىرىپ تيەۋ قۋاتى 17,7 ملن توننانى قۇرايدى.
م. قاجىكەن كەزدەسۋ بارىسىندا پورت قىزمەتكەرلەرىنە ءوزىنىڭ سايلاۋالدى تۇعىرناماسىن تانىستىردى. تيىسىنشە پورتتىڭ ەل ءۇشىن حالىقارالىق اۋقىمداعى ۇلكەن ەكونوميكالىق مۇمكىندىكتەر اشاتىنىن اتاپ ءوتتى.
«اقتاۋ پورتى-ۇلكەن الەمگە جەتەلەر قاقپا. ونىڭ جۇكتەردى اۋىستىرىپ، تيەۋدى ۇلعايتۋ ءۇشىن الەۋەتى بار. ەلدەگى كولىك لوگيستيكاسى جۇيەسىندەگى ماڭىزى زور»، - دەدى كانديدات.
سايلاۋشىلار قولدانىستاعى جولداردىڭ ساپاسىنا نارازىلىقتارىن ءبىلدىرىپ، م.قاجىكەننىڭ بۇل ماسەلەنى قالاي شەشۋدى جوسپارلاپ وتىرعانىن سۇرادى.
«جولدار-كوممۋنيكاتسيا، كوممۋنيكاتسيا – ەكونوميكا. جولسىز بايلانىس تا، ەكونوميكا دا بولمايدى. ىشكى جانە حالىقارالىق ماڭىزى بار كوپتەگەن ساپالى جولداردى سالۋ قاجەت. ساپالى جولدار كوپ ينۆەستيتسيانى قاجەت ەتەدى. بىراق قازىر قۇرىلىس سالاسىندا ۇنەمدەۋ بايقالادى. قازاقستاندا كۇردەلى جوندەۋدى قاجەت ەتەتىن كوپتەگەن جولدار بار. مەن ەل ارالاپ شىقتىم جانە بۇل ماسەلە تۋرالى بىلەمىن»، - دەپ اتاپ ءوتتى ول.
كانديدات سونىمەن قاتار مەملەكەتتىك باسقارۋدى ورتالىقسىزداندىرۋ، ايەلدەردىڭ زەينەتكەرلىك جاسىن تومەندەتۋ، ەڭ تومەنگى جالاقىنى اشىق ەسەپتەۋ، ەكولوگيا، ساپالى ءبىلىم بەرۋ جانە قولجەتىمدى مەديتسينا ماسەلەلەرىن كوتەردى.
بيۋدجەتارالىق رەتتەۋدىڭ ءتيىمدى مودەلىن قۇرۋ تۋرالى ايتا كەلە، كانديدات وڭىرلەردە ءوز ماسەلەلەرىنىڭ كوپشىلىگىن وزدەرى شەشۋى ءتيىس ەكەنىن اتاپ ءوتتى.
«جانە ولار مۇنى ىستەي الادى. اكىم اكىمشىلىك ورتالىققا نەمەسە استاناعا بارىپ، مەكتەپ سالۋعا نەمەسە اۋرۋحانانى جوندەۋگە اقشا سۇراماۋى كەرەك. مۇنداي ماسەلەلەر جەرگىلىكتى جەرلەردە شەشىلۋى كەرەك. سالىق اقشاسىنىڭ كوپ بولىگى ايماقتا قالۋى كەرەك»، - دەپ تۇيىندەدى ول.
ايتا كەتەيىك، «اقتاۋ تەڭىز ساۋدا پورتى ۇك» اق - 1963 جىلى كاسپي تەڭىزىنىڭ شىعىس جاعالاۋىندا سالىنعان. العاشىندا ماڭعىشلاق ءوڭىرىنىڭ ۋران ونەركاسىبى مەن مۇناي كەن ورىندارىن دامىتۋدى قولداۋ ماقساتىندا قۇرىلعان.
پورتتىڭ قۇرىلۋى نەگىزگى جانە قوسالقى تولقىن اعىندارىن جانە ءبىر ۋاقىتتا ءتورت قۇرعاق جۇك ايلاعىن سالۋدان باستالدى. 1969 – 1986 جىلدارى ءتورت مۇناي قۇيۋ ايلاعى مەن پاروم كەشەنى قۇرىلدى. اقتاۋ پورتى ارقىلى تاسىمالدىڭ باسىم بولىگى مۇنايعا تيەسىلى بولدى – 80-جىلداردىڭ باسىندا جىلىنا 7 ملن تونناعا دەيىن، ال قۇرعاق جۇكتەردى تاسىمالداۋ جىلىنا 300 مىڭ توننادان اسپادى.
بۇگىندە اقتاۋ پورتى جىلىنا 12 اي جانە تاۋلىگىنە 24 ساعات شىعىستان باتىسقا، سولتۇستىكتەن وڭتۇستىككە جانە كەرى باعىتتا جۇك تاسىمالداۋدى قامتاماسىز ەتەتىن زاماناۋي كوپ ماقساتتى تەرمينال بولىپ تابىلادى. ونىڭ بىرنەشە كولىك دالىزدەرىنىڭ قيىلىسىندا ورنالاسۋى مەملەكەتتىڭ دامۋىندا ستراتەگيالىق ماڭىزىن ارتتىرادى.
