قازاقستاندىق وقۋشىلار العاش رەت روبوتوتەحنيكا بويىنشا دۇنيەجۇزىلىك جارىستا جۇلدەلى بولدى. بۇل تۋرالى قر وقۋ-اعارتۋ ءمينيسترى اسحات ايماعامبەتوۆ حابارلادى، دەپ جازادى "ادىرنا" ۇلتتىق پورتالى.
"قۋانىشتى جاڭالىق! وقۋشىلارىمىز كەزەكتى رەت وتە جوعارى دەڭگەي كورسەتىپ، العاش رەت روبوتوتەحنيكادان الەم وليمپياداسىندا 2-ورىنعا يە بولدى. جارىس گەرمانيانىڭ دورتمۋند قالاسىندا ءوتتى. شىمكەنت قالاسىنداعى ج. جاباەۆ اتىنداعى №26 مەملەكەتتىك مەكتەپ پەن №9 IT-ليتسەيىنىڭ وقۋشىلارى يمانعالي مىڭجاسار مەن بيبارىس ميحاش جەڭىمپاز اتاندى. World Robot Olympiad (WRO) 2004 جىلدان بەرى وتكىزىلىپ كەلەدى. قازاقستان بۇل وليمپيادانىڭ 2014 جىلدان بەرگى قاتىسۋشىسى. بيىل 73 ەلدىڭ 365 كومانداسى فينالدا ۇزدىك اتاققا تالاستى. ال ىرىكتەۋ كەزەڭىنە بۇكىل الەم بويىنشا 15 000 كوماندا قاتىستى. بالالاردىڭ الەمدىك ارەناداعى جەڭىستەرى ەرەكشە ماقتانىش سەزىمىن تۋدىرادى. جاس جانە دارىندى جەڭىمپازدارىمىزدى وسىنداي جوعارى ناتيجەمەن قۇتتىقتايمىن! سونداي-اق ولاردىڭ تالىمگەرلەرى مەن اتا-انالارىن دا قۇتتىقتايمىن! بالالارعا بيىك بەلەستەردى باعىندىرا بەرۋلەرىنە تىلەكتەسپىن!", - دەپ جازدى مينيستر.
"ادىرنا" ۇلتتىق پورتالى
