قازاقستاندىق وقۋشىلار ءۇندىستاننىڭ حايداراباد قالاسىندا وتكەن WRO Asia-Pacific Open Championship 2026 حالىقارالىق روبوتوتەحنيكا چەمپيوناتىندا قولا جۇلدەگە يە بولدى. ەل قۇراماسىن بايراقتى دوداعا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى دايىندادى. NIS 2014 جىلدان بەرى World Robot Olympiad (WRO) قوزعالىسىنىڭ قازاقستانداعى ۇلتتىق ۇيلەستىرۋشىسى قىزمەتىن اتقارىپ كەلەدى.
بيىل چەمپيوناتتا الەمنىڭ 25 ەلىنەن كەلگەن 400-گە جۋىق جاس ينجەنەر 150-گە تارتا كوماندا قۇرامىندا باق سىنادى. قازاقستان اتىنان جارىسقا اقتاۋ، تۇركىستان جانە شىمكەنت قالالارىنان ءۇش كوماندا قاتىستى.
قولا جۇلدەنى اقتاۋداعى مامانداندىرىلعان IT-ليتسەيدىڭ «ITL NOMAD» كومانداسى يەلەندى. ەرنۇر شامىران مەن دانيار تەنەلحان جاتتىقتىرۋشىسى ىرىسدجان شاحيموۆانىڭ جەتەكشىلىگىمەن «Smart Museum» جوباسىن تانىستىرىپ، Future Innovators Elementary ساناتىندا 160 ۇپايمەن ءۇشىنشى ورىن الدى. جوبا مۋزەيگە ارنالعان روبوت-گيد پەن قازاقتىڭ ۇلتتىق اسپاپتارىنىڭ 3D مودەلدەرىنەن تۇرادى. ونىڭ كومەگىمەن كەلۋشىلەر ەكسپوناتتارمەن تانىسىپ، ۇلتتىق اسپاپتاردىڭ ءتول ءۇنىن تىڭداي الادى. قازاقستاندىق كوماندا وسى جوبامەن وڭتۇستىك كورەيا، گەرمانيا، يران، ءۇندىستان جانە رۋمىنيانىڭ بىرقاتار قارسىلاسىن باسىپ وزدى.
ال تۇركىستانداعى RoboMektep.kz روبوتوتەحنيكا مەكتەبىنىڭ «RoboKent/RoboMektep.kz» كومانداسى RoboMission Elementary ساناتىندا ۇزدىك وندىققا ەندى. دۋلات ابدىحالىق پەن حاقنازار دجاكسىلىكوۆ جاتتىقتىرۋشىسى الماس تاشيموۆتىڭ جەتەكشىلىگىمەن 355 ۇپاي جيناپ، ونىنشى ورىنعا تۇراقتادى.
شىمكەنتتەگى RoboPark روبوتوتەحنيكا مەكتەبىنىڭ «RP_Energy» كومانداسى RoboMission Junior ساناتىندا 18-ورىن يەلەندى. قازاقستاندىق كوماندا گەرمانيا، رۋمىنيا، ميانما جانە مەكسيكا وكىلدەرىنەن جوعارى ناتيجە كورسەتتى.
ايتا كەتەيىك، نازارباەۆ زياتكەرلىك مەكتەپتەرى قازاقستانداعى WRO قوزعالىسىن 2014 جىلدان بەرى ۇيلەستىرىپ كەلەدى. وسى ۋاقىت ىشىندە NIS ۇلتتىق جارىستار مەن ىرىكتەۋ كەزەڭدەرىن وتكىزىپ، كوماندالاردى حالىقارالىق سايىستارعا دايىنداۋ، وقۋ-جاتتىعۋ جيىندارىن ۇيىمداستىرۋ، قاتىسۋشىلارعا ادىستەمەلىك جانە ۇيىمداستىرۋشىلىق قولداۋ كورسەتۋ جۇمىستارىن جۇيەلى تۇردە جۇرگىزىپ كەلەدى.
2026 جىلعى حالىقارالىق ماۋسىم الدىندا NIS كوماندالار ءۇشىن قارقىندى وقۋ-جاتتىعۋ جيىندارىن ۇيىمداستىردى. جاس روبوتوتەحنيكتەر بۇل جيىنداردا ۇندىستانداعى WRO Asia-Pacific Open Championship پەن WRO International Final دودالارىنا قاتار دايىندالدى.
WRO Asia-Pacific Open Championship – World Robot Olympiad اياسىندا جىل سايىن الەمنىڭ ءۇش وڭىرىندە وتەتىن حالىقارالىق اشىق چەمپيوناتتاردىڭ ءبىرى. بۇل جارىستار ازيا-تىنىق مۇحيتى ايماعىندا، ەۋروپا جانە امەريكا قۇرلىقتارىندا ۇيىمداستىرىلادى. بيىل ءۇندىستاندا وتكەن ازيا-تىنىق مۇحيتى چەمپيوناتىن WRO Association جانە India STEM Foundation ۇيىمداستىردى.
حالىقارالىق دەڭگەيدەگى مۇنداي جارىستار قازاقستاندىق وقۋشىلارعا الەمنىڭ ۇزدىك جاس روبوتوتەحنيكتەرىمەن باسەكەگە ءتۇسىپ، ينجەنەرلىك داعدىلارىن شىڭداۋعا جانە تاجىريبە الماسۋعا مۇمكىندىك بەرەدى.
WRO 2026 حالىقارالىق ماۋسىمى 8–10 جەلتوقسان ارالىعىندا پۋەرتو-ريكونىڭ سان-حۋان قالاسىندا وتەتىن الەمدىك فينالمەن جالعاسادى. بيىلعى ماۋسىم «Robots Meet Culture» تاقىرىبىنا ارنالعان. الەمدىك فينالدا قازاقستان نامىسىن توعىز كوماندا قورعايدى. ونىڭ بەسەۋى – نازارباەۆ زياتكەرلىك مەكتەپتەرىنەن، ال تورتەۋى – ەلىمىزدىڭ جالپى ءبىلىم بەرەتىن مەكتەپتەرىنەن.
