ءۇندىستان رەسەي مۇنايى يمپورتىن قىسقارتىپ، اقش-پەن ساۋدانى قىزدىرماق

ءۇندىستاننىڭ مەملەكەتتىك Indian Oil جانە Bharat Petroleum كومپانيالارى، سونداي-اق جەكەمەنشىك Reliance Industries رەسەيلىك مۇناي جەتكىزۋگە ارنالعان جاڭا ۇسىنىستاردى قابىلداۋدى توقتاتتى. اڭگىمە ءناۋرىز–ساۋىر ايلارىنا جوسپارلانعان پارتيالار تۋرالى بولىپ وتىر. بۇل تۋرالى Reuters اگەنتتىگى سالاداعى دەرەككوزدەرگە سىلتەمە جاساپ جاريالادى، دەپ حابارلايدى "ادىرنا".

دەرەككوزدەر مالىمدەگەندەي، كومپانيالار بۇل شەشىمدى الداعى ۋاقىتتا دا ۇستانۋدى جوسپارلاپ وتىر. بۇل قادامنىڭ سەبەبى – ءۇندىستان مەن اقش اراسىنداعى ساۋدا كەلىسىمىن قولداۋ جانە امەريكالىق تاراپپەن ۇزاق مەرزىمدى ىنتىماقتاستىقتى كۇشەيتۋ ارەكەتى.

سونىمەن قاتار، كوپتەگەن باسقا ءۇندى مۇناي وڭدەۋ زاۋىتتارى رەسەيلىك مۇناي ساتىپ الۋدى توقتاتقان. جەتكىزىلىمدەردىڭ قايتا باستالۋى تەك ءۇندىستان ۇكىمەتىنىڭ رۇقساتىمەن مۇمكىن بولادى. مۇنداي رۇقسات، اسىرەسە، ەۋرووداق سانكتسياسىنا ىلىككەن جانە ۇلەسىنىڭ ءبىر بولىگى «روسنەفتكە» تيەسىلى Nayara Energy كومپانياسىنا بەرىلۋى ىقتيمال.

اقش پرەزيدەنتى دونالد ترامپ 7 اقپاندا ءۇندى تاۋارلارىنا سالىنعان 25 پايىزدىق باج سالىعىن الىپ تاستادى. ول نيۋ-دەليدىڭ رەسەي مۇنايىن «تىكەلەي نەمەسە جاناما» يمپورتتاۋدى توقتاتۋعا مىندەتتەمە العانىن اتاپ ءوتتى. ترامپ اقش بۇل جاعدايدى باقىلاۋدا ۇستايتىنىن جانە جەتكىزىلىمدەر قايتا باستالسا تاريفتەردى قايتا ەنگىزۋى مۇمكىن ەكەنىن ەسكەرتتى.

اتالعان شارالار اياسىندا اقش پەن ءۇندىستان رامالىق ساۋدا كەلىسىمىنە قول قويىپ، ءۇندىستان بەس جىل ىشىندە امەريكالىق ونىمدەرگە 500 ملرد دوللار كولەمىندە تاپسىرىس بەرۋگە مىندەتتەلدى. كەلىسىمگە ەنەرگيا رەسۋرستارى، ۇشاقتار مەن اۆياتسيالىق بولشەكتەر، باعالى مەتالدار، تەحنولوگيالىق تاۋارلار جانە كومىر كىرەدى.

2022 جىلى ۋكرايناداعى سوعىستان كەيىن ءۇندىستان رەسەيلىك مۇنايدىڭ ەڭ ءىرى ساتىپ الۋشىسىنا اينالعان. سول كەزەڭدە باتىس سانكتسيالارىنىڭ اسەرىنەن ۇسىنىلعان جەڭىلدىكتەر ارقاسىندا جەتكىزىلىم كولەمى تاۋلىگىنە شامامەن 2 ملن باررەلگە جەتكەن. الايدا كەيىن اقش پەن ەۋرووداق قىسىمىمەن يمپورت ازايىپ، Reuters دەرەگىنشە، كوكتەمدە بۇل كورسەتكىش 500–600 مىڭ باررەلگە دەيىن تومەندەۋى مۇمكىن. وسىعان بايلانىستى ءۇندى مۇناي وڭدەۋ زاۋىتتارى تاياۋ شىعىس، افريكا جانە وڭتۇستىك امەريكا ەلدەرىنەن مۇناي يمپورتىن ارتتىرۋدا.