اقش پەن ۆەنەسۋەلا مۇناي سالاسىنداعى ىنتىماقتاستىق بويىنشا كەلىسىمگە كەلدى، دەپ حابارلايدى “ادىرنا” ءتىلشىسى ۆۆس-گە سىلتەپ.
اقش پرەزيدەنتى ترامپتىڭ ايتۋىنشا، كەلىسىم ۆەنەسۋەلانىڭ 65 ميلليارد باررەلدەن استام دالەلدەنگەن مۇناي قورىن باقىلاۋعا مۇمكىندىك بەرەدى. ونىڭ سوزىنشە، بۇل اقش-تىڭ مۇناي قورىن ەكى ەسەدەن استام ارتتىرىپ، ەلدەگى مۇناي جەتكىزىلىمىن ۇلعايتادى. سونداي-اق پرەزيدەنت كەلىسىم اقش-تاعى جانارماي باعاسىن تومەندەتۋگە ىقپال ەتەتىنىن حابارلادى.
«بۇل تاريحي كەلىسىم اقش-تىڭ مۇناي قورىن ەكى ەسەدەن استام ارتتىرادى»، – دەپ جازدى دونالد ترامپ Truth Social الەۋمەتتىك جەلىسىندە.
اقش مەملەكەتتىك حاتشىسى ماركو رۋبيو كەلىسىمدى «امەريكالىق جانە ۆەنەسۋەلالىق حالىق ءۇشىن ۇلكەن جەڭىس» دەپ اتادى. ونىڭ مالىمدەۋىنشە، كەلىسىم اياسىندا ۆەنەسۋەلا ەكونوميكاسىنا شامامەن 100 ميلليارد دوللار جەكە ينۆەستيتسيا تارتىلىپ، مىڭداعان جوعارى جالاقىلى جۇمىس ورنى قۇرىلۋى مۇمكىن.
ترامپتىڭ مالىمەتىنشە، كەلىسىمگە اقش مەملەكەتتىك حاتشىسى ماركو رۋبيو مەن قورعانىس ءمينيسترى پيت حەگسەت ۆەنەسۋەلانىڭ ۋاقىتشا پرەزيدەنتى دەلسي رودريگەسپەن جەكە بيزنەس وكىلدەرىمەن سەرىكتەستىك اياسىندا قول جەتكىزگەن.
اقش پرەزيدەنتى كەلىسىمنىڭ ناقتى شارتتارىن جاريالاعان جوق. ول امەريكالىق سالىق تولەۋشىلەرگە قوسىمشا شىعىن تۇسپەيتىنىن اتاپ ءوتتى.
قازىر ۆەنەسۋەلا تاراپى بۇل مالىمدەمەگە قاتىستى رەسمي تۇسىنىكتەمە بەرگەن جوق. كەلىسىمنىڭ تولىق تالاپتارى مەن تاراپتاردىڭ مىندەتتەمەلەرى ازىرگە جاريالانبادى.
