Qazaqstandyq oquşylar Ündıstannyŋ Haidarabad qalasynda ötken WRO Asia-Pacific Open Championship 2026 halyqaralyq robototehnika chempionatynda qola jüldege ie boldy. El qūramasyn bairaqty dodaǧa «Nazarbaev Ziiatkerlık mektepterı» derbes bılım beru ūiymy daiyndady. NIS 2014 jyldan berı World Robot Olympiad (WRO) qozǧalysynyŋ Qazaqstandaǧy ūlttyq üilestıruşısı qyzmetın atqaryp keledı.
Biyl chempionatta älemnıŋ 25 elınen kelgen 400-ge juyq jas injener 150-ge tarta komanda qūramynda baq synady. Qazaqstan atynan jarysqa Aqtau, Türkıstan jäne Şymkent qalalarynan üş komanda qatysty.
Qola jüldenı Aqtaudaǧy mamandandyrylǧan IT-liseidıŋ «ITL NOMAD» komandasy ielendı. Ernūr Şamyran men Daniiar Tenelhan jattyqtyruşysy Yrysdjan Şahimovanyŋ jetekşılıgımen «Smart Museum» jobasyn tanystyryp, Future Innovators Elementary sanatynda 160 ūpaimen üşınşı oryn aldy. Joba muzeige arnalǧan robot-gid pen qazaqtyŋ ūlttyq aspaptarynyŋ 3D modelderınen tūrady. Onyŋ kömegımen keluşıler eksponattarmen tanysyp, ūlttyq aspaptardyŋ töl ünın tyŋdai alady. Qazaqstandyq komanda osy jobamen Oŋtüstık Koreia, Germaniia, İran, Ündıstan jäne Rumyniianyŋ bırqatar qarsylasyn basyp ozdy.
Al Türkıstandaǧy RoboMektep.kz robototehnika mektebınıŋ «RoboKent/RoboMektep.kz» komandasy RoboMission Elementary sanatynda üzdık ondyqqa endı. Dulat Äbdıhalyq pen Haqnazar Djaksylykov jattyqtyruşysy Almas Taşimovtyŋ jetekşılıgımen 355 ūpai jinap, onynşy orynǧa tūraqtady.
Şymkenttegı RoboPark robototehnika mektebınıŋ «RP_Energy» komandasy RoboMission Junior sanatynda 18-oryn ielendı. Qazaqstandyq komanda Germaniia, Rumyniia, Mianma jäne Meksika ökılderınen joǧary nätije körsettı.
Aita keteiık, Nazarbaev Ziiatkerlık mektepterı Qazaqstandaǧy WRO qozǧalysyn 2014 jyldan berı üilestırıp keledı. Osy uaqyt ışınde NIS ūlttyq jarystar men ırıkteu kezeŋderın ötkızıp, komandalardy halyqaralyq saiystarǧa daiyndau, oqu-jattyǧu jiyndaryn ūiymdastyru, qatysuşylarǧa ädıstemelık jäne ūiymdastyruşylyq qoldau körsetu jūmystaryn jüielı türde jürgızıp keledı.
2026 jylǧy halyqaralyq mausym aldynda NIS komandalar üşın qarqyndy oqu-jattyǧu jiyndaryn ūiymdastyrdy. Jas robototehnikter būl jiyndarda Ündıstandaǧy WRO Asia-Pacific Open Championship pen WRO International Final dodalaryna qatar daiyndaldy.
WRO Asia-Pacific Open Championship – World Robot Olympiad aiasynda jyl saiyn älemnıŋ üş öŋırınde ötetın halyqaralyq aşyq chempionattardyŋ bırı. Būl jarystar Aziia-Tynyq mūhity aimaǧynda, Europa jäne Amerika qūrlyqtarynda ūiymdastyrylady. Biyl Ündıstanda ötken Aziia-Tynyq mūhity chempionatyn WRO Association jäne India STEM Foundation ūiymdastyrdy.
Halyqaralyq deŋgeidegı mūndai jarystar qazaqstandyq oquşylarǧa älemnıŋ üzdık jas robototehnikterımen bäsekege tüsıp, injenerlık daǧdylaryn şyŋdauǧa jäne täjıribe almasuǧa mümkındık beredı.
WRO 2026 halyqaralyq mausymy 8–10 jeltoqsan aralyǧynda Puerto-Rikonyŋ San-Huan qalasynda ötetın älemdık finalmen jalǧasady. Biylǧy mausym «Robots Meet Culture» taqyrybyna arnalǧan. Älemdık finalda Qazaqstan namysyn toǧyz komanda qorǧaidy. Onyŋ beseuı – Nazarbaev Ziiatkerlık mektepterınen, al törteuı – elımızdıŋ jalpy bılım beretın mektepterınen.
