ۇلىبريتانيالىق جازۋشى م. دجون حارريسون 2026 جىلعى بۋكەر سىيلىعىنىڭ لاۋرەاتى اتاندى، دەپ حابارلايدى "ادىرنا" ۇلتتىق پورتالى.
81 جاستاعى قالامگەر بۇل ماراپات تاريحىنداعى ەڭ ەگدە جاستاعى جەڭىمپاز بولدى.
جازۋشىعا سىيلىقتى ء«بارىنىڭ سوڭى» اتتى ساتيرالىق انتيۋتوپيالىق رومانى ءۇشىن تابىستاعان. ماراپاتتاۋ ءراسىمى 9 قاراشادا لوندوندا وتكەن. جەڭىمپازعا 50 مىڭ فۋنت ستەرلينگ (شامامەن 60 مىڭ ەۋرو) كولەمىندە سىياقى بەرىلدى.
رومان وقيعاسى جاقىن بولاشاقتا لا-مانش بۇعازىنىڭ جاعالاۋىندا ءوربيدى. شىعارما جەلىسى بويىنشا، بەلگىسىز اپات سالدارىنان قوعام كۇيرەپ، ۇلىبريتانياعا جۇمباق عالامشارلىق تىرشىلىك يەلەرى اعىلىپ كەلەدى. تەڭىز جاعالاۋىنان تولقىن شايىپ اكەلگەن زاتتاردى جيناۋمەن اينالىساتىن كەيىپكەر ءپىشىنىن وزگەرتە الاتىن قۇپيا ارتەفاكت تاۋىپ الادى.
قازىلار القاسىنىڭ ءتورايىمى، تاريحشى مەري بيرد شىعارمانى بولاشاق ارقىلى بۇگىنگى ساياساتتى بەينەلەيتىن تۋىندى دەپ باعالاعان. ونىڭ ايتۋىنشا، رومان ءوزى تولىق تۇسىنبەيتىن اپاتپەن بەتپە-بەت كەلگەن قوعامنىڭ جاعدايىن سۋرەتتەيدى.
بيىلعى سىيلىقتىڭ قىسقا تىزىمىنە التى شىعارما ەنگەن. ولاردىڭ قاتارىندا بۇعان دەيىن دە بۋكەر سىيلىعىن العان يامايكالىق مارلون دجەيمس پەن شوتلانديالىق دۋگلاس ستيۋارتتىڭ روماندارى بولعان.
ايتا كەتەيىك، بۋكەر سىيلىعى 1969 جىلى قۇرىلعان. 2014 جىلدان باستاپ ۇلىبريتانيادا نەمەسە يرلانديادا جارىق كورگەن اعىلشىن تىلىندەگى شىعارمالاردىڭ اۆتورلارى ماراپاتقا ۇمىتكەر بولا الادى. 2025 جىلى سىيلىقتى كانادالىق-ۆەنگريالىق-بريتاندىق جازۋشى دەۆيد سالاي «ەت» (Flesh) رومانى ءۇشىن يەلەنگەن. ال 2024 جىلى بريتاندىق جازۋشى سامانتا ءحارۆيدىڭ «وربيتادا» (Orbital) شىعارماسى ۇزدىك دەپ تانىلعان.
